Գյումրիում վիրավոր ձիով ֆայտոն շահագործելու թեման՝ իրավապահների տիրույթում

Համացանցում վերջին օրերին կենդանասերների կողմից բուռն քննարկման առիթ է տվել մի լուսանկար, որտեղ երևում է, թե ինչպես է վնասվածք ունեցող ձին օգտագործվում Գյումրիում ֆայտոն ծառայություն մատուցելու համար։ Կենդանասերները հորդորում են Գյումրի այցելող զբոսաշրջիկներին բոյկոտել ու չնստել ձիակառքը, իսկ տեղի պաշտոնյաներից պահանջում՝ միջամտել հարցին ու վերջ դնել կենդանու դաժան շահագործմանը։

Կառապանի հետ հանդիպել, զրուցել Factor.am-ին չհաջողվեց: Սովորաբար այնտեղ, որտեղ կանգնում են կառապանները, այսօր կեսօրին դատարկ էր։ Գյումրու համայնքապետի մամլո խոսնակ Սոնա Առաքելյանը մեզ տեղեկացրեց, որ համայնքապետարանի մի քանի պաշտոնյաներ զանգահարել են կառապանին, որի անունը Արտուշ է, ու պահանջել, որպեսզի նա դադարեցնի կենդանուն այդ վիճակում շահագործելը։ Ըստ Առաքելյանի՝ կառքը տվյալ անձի սեփականությունն է, համայնքապետարանը որևէ գործառույթ չունի շահագործումը դադարեցնել ստիպելու, սակայն պարզաբանումներ են պահանջել։ Կառապանը, ըստ մեր զրուցակցի, հայտնել է, թե կենդանին այնքան էլ վատ վիճակում չէ, և որ ինքն ունի անասնաբույժի համապատասխան թույլտվություն։

Սոնա Առաքելյանը նշեց, որ այս հարցը քննում են իրավապահները։ Կառապանը ոստիկանությանը տված բացատրությունում նշել է, որ ձիու թամբը նոր է, որի պատճառով էլ վերք է բացվել։

Ինչպես Factor.am-ին տեղեկացրեց ՀՀ ոստիկանության հասարակայնության հետ կապի և լրատվության վաչության պետի տեղակալ Էդգար Ջանոյանը․ «Հրապարակման հիման վրա ոտիկանության Կումայրի բաժնում կազմված փաստաթղթերը ուղարկվել են նախաքննական մարմին՝ քրեական վարույթ նախաձեռնելու համար»։

Արմիկ Մովսիսյան