Օրհան Փամուկն ու այլ հայտնի թուրք գրական գործիչներ համատեղ հայտարարությամբ հանդես են եկել Էրդողանի՝ ԶԼՄ-ները սահմանափակող նոր օրենքի դեմ

Թուրքական գրական աշխարհի հայտնի ավելի քան 200 անդամներ համատեղ հայտարարություն են տարածել՝ իրենց ձայնը բարձրացնելու վերջերս հաստատված օրենքի դեմ, որը կարգավորում է լրատվամիջոցները՝ «կեղծ տեղեկությունների տարածումը» համարելով է քրեական հանցագործություն, գրում են տեղական լրատվամիջոցները։

«Մենք մերժում ենք գրաքննության օրենքը, որը երկիրը կտանի խորը խավար։ Մենք կպաշտպանենք մարդկանց ու աշխարհի ճշմարտությունը բռնակալների ստից»,-ասվում է հայտարարության մեջ։

Հայտարարությունը ստորագրողների թվում են Նոբելյան մրցանակակիր թուրք գրող Օրհան Փամուկը, գրող և բանաստեղծ Մուրաթան Մունգանը, գրող և երգիչ Զուլֆու Լիվանելին, գրող և բանաստեղծ Ահմեդ Ումիթը, բանաստեղծ Բիրհան Քեսքինը, Սեմա Քայգուսուզը, վիպասան, էսսեիստ, գրող Բուքեթ Ուզուները։

Հավելենք, որ հոկտեմբերի 13-ին Թուրքիայի խորհրդարանի կողմից հաստատված նոր օրենքը բաղկացած է 40 հոդվածից, որոնք փոփոխում են մի շարք օրենքներ, այդ թվում՝ ինտերնետի մասին օրենքը, մամուլի մասին օրենքը և Թուրքիայի քրեական օրենսգիրքը։

Նոր օրենքը «կեղծ տեղեկատվոթյան տարածումը» դարձնում է քրեական հանցագործություն, որը պատժվում է մեկից երեք տարվա ազատազրկմամբ։

Օրենքը, որն առաջարկվել է նախագահ Ռեջեփ Թայիփ Էրդողանի Արդարություն և զարգացում կուսակցության կողմից, ընդունվել է ընդհանուր ընտրություններից ընդամենը ութ ամիս առաջ։ Սոցհարցումների արդյունքներով՝ Էրդողանը հետ է մնում ընտրություններում։ Օրենքն ընդունվել է խորհրդարանում իշխող ուժի ու նրա կոալիցիոն գործընկեր Ազգայնական շարժում կուսակցության ձայներով, թեև դրան բուռն դեմ էին Թուրքիայի հիմնական ընդդիմադիր խմբերը:

Էրդողանը ևս հաստատել է այն, որի մասին հրապարակվել է պաշտոնական տեղեկագրում։

Միջազգային տարբեր կառույցներ Թուրքիայի իշխանություններին կոչ էին արել հրաժարվել այս օրենքի ընդունումից։

Էմմա Չոբանյան