23.06.2026 | 00:27
Ամենամեծ էկրանով ստադիոնը, չսպասված երկրպագուներ. ԱԱ-2026-ի Բելգիա-Իրան խաղը` Factor TV-ի աչքերով
Էրդողանը հայտնել է, որ Պուտինի հետ պայմանավորվել է Թուրքիայում նոր գազային հանգույցի ստեղծման հարցով
Քաղաքականություն
19.10.2022 | 22:08
Թուրքիայի նախագահ Ռեջեփ Թայիփ Էրդողանը հայտարարել է, որ ՌԴ նախագահ Վլադիմիր Պուտինի հետ պայմանավորվել է գազային հանգույցի ստեղծման շուրջ, և որ Եվրոպան կարող է Թուրքիայի միջոցով օգտագործել ռուսական գազը, գրում է ՌԻԱ Նովոստին։
«Հիմա Եվրոպան մտածում է, թե ինչպես իրեն ապահովի էներգիայով առաջիկա ձմեռային շրջանում։ Մենք, փառք Աստծո, նման խնդիր չունենք։ Ավելին, պարոն Պուտինի հետ վերջին հանդիպմանը պայմանավորվել ենք Թուրքիայում գազային հանգույցի ստեղծման մասին։ Ինչպես նա է հայտարարել՝ Եվրոպան կարող է ռուսական գազը Թուրքիայի միջոցով օգտագործել»,- ասել է Էրդողանը խորհրդարանում «Արդարություն ու զարգացում» խմբակցության հետ հանդիպմանը։
Հիշեցնենք, որ հոկտեմբերի 13-ին Աստանայում տեղի էր ունեցել Թուրքիայի նախագահ Ռեջեփ Թայիփ Էրդողանի ու ՌԴ նախագահ Վլադիմիր Պուտինի հանդիպումը, որի ընթացքում ռուսական կողմն Անկարային առաջարկել էր գազային հանգույց ստեղծել Եվրոպա մատակարարումների համար։ Պուտին-Էրդողան հանդիպումից հետո ՌԴ նախագահի մամուլի խոսնակ Դմիտրի Պեսկովը հայտարարել է, թե երկու նախագահները հանձնարարել են մանրամասն ու շատ արագ մշակել գազային հանգույցի ստեղծման հարցը։
Աստանայից վերադառնալիս էլ լրագրողների հետ զրույցում Էրդողանն ասել էր, որ Թուրքիայի Էներգետիկայի և բնական պաշարների նախարարությանը և ռուսական կողմից համապատասխան գերատեսչություններին հանձնարարվել է համատեղ քայլեր մշակել այդ ուղղությամբ։ Նա նաև նշել էր, որ Թրակիայի շրջանը կարող է դառնալ նոր գազային հանգույցի ստեղծման ամենահարմար վայրը։
Էմմա Չոբանյան
