25.06.2026 | 18:02
Կարևոր է օգտագործել առկա հնարավորությունները՝ Հայաստանի հետ խաղաղության գործընթացն ավարտելու համար․ Ադրբեջանի ԱԳՆ
Դատարանը քննում է Էրիկ Աեքսանյանին կալանավորելու միջնորդությունը
Հասարակություն
18.10.2022 | 13:15
Երևան քաղաքի ընդհանուր իրավասության դատարանը` նախագահությամբ դատավոր Արշակ Մաթևոսյանի, քիչ առաջ սկսել է փաստաբան Էրիկ Ալեքսանյանի խափանման միջոցի հարցի քննությունը: Մինչ նիստի մեկնարկը Ալեքսանյանի փաստաբաններից Գայանե Պապոյանը դատարանի դիմաց լրագրողների հետ զրույցում ասաց, որ Էրիկ Ալեքսանյանին մեղադրում են դատավոր Արուսյակ Ալեքսանյանին օժանդակելու մեջ, ինչն, ըստ ԱԱԾ-ի դրսևորվել է միջնորդության ձևով: Մասնավորապես` ըստ Գայանե Պապոյանի` Էրիկ Ալեքսանյանը որպես փաստաբան միջնորդել է քրեական գործերից մեկով գրավ կիրառել իր պաշտպանյալի նկատմամբ, և դատավոր Արուսյակ Ալեքսանյանը բավարարել է միջնորդությունը:
Այժմ ԱԱԾ-ն պնդում է, որ դատավոր Ալեքսանյանը ակնհայտ ապօրինի դատական ակտ է կայացրել, չարաշահել է լիազորություննները, և Էրիկ Ալեքսանյանը դատավորին օժանդակել է լիազորությունների չարաշահման հարցում: Դիտարկմանը, որ այդ տրամաբանությամբ ցանկացած փաստաբանի կարող է մեղադրանք առաջադրվել և հարցին` վերը նշված միջնորդությունից բացի գործով առկա չէ՞ օրինակ Էրիկ Ալեքսանյանի դեմ ցուցմունք կամ օպերատիվ հետախուզական միջոցառման արդյունքում ստացված տվյալներ, որոնք առնվում են փաստաբանի մեղադրանքին, պաշտպան Պապոյանն ասաց, որ իրենց այլ տվյալներ հայտնի չեն, Ալեքսանյանի դեմ տրված ցուցմունք առկա չէ:
Արաքս Մամուլյան
