21.04.2026 | 17:45
Ադրբեջանը չի ապահովել Լեռնային Ղարաբաղի հակամարտությունից տուժած անձանց պաշտպանությունը. Amnesty International
Բորելը հեռախոսազրույցներ է ունեցել Միրզոյանի և Բայրամովի հետ
Քաղաքականություն
14.10.2022 | 17:43
ԵՄ բարձր ներկայացուցիչ Ժոզեպ Բորելը առանձին երկկողմ հեռախոսազրույցներ է ունեցել հոկտեմբերի 10-ին՝ Ադրբեջանի արտաքին գործերի նախարար Ջեյհուն Բայրամովի և հոկտեմբերի 14-ին՝ Հայաստանի արտգործնախարար Արարատ Միրզոյանի հետ։ Այս մասին նշվում է ԵՄ պաշտոնական կայքում հրապարակված հաղորդագրությունում։
Նա երկու ԱԳ նախարարների հետ քննարկել է հոկտեմբերի 6-ին Պրահայում հայ-ադրբեջանական սահմանի հայկական կողմում ԵՄ քաղաքացիական առաքելություն տեղակայելու շուրջ ձեռք բերված համաձայնության հետագա ընթացքը՝ նպատակ ունենալով վստահություն ստեղծել և նպաստել սահմանային հանձնաժողովների աշխատանքին։ Բորելը ներկայացրել է տեղակայման ընթացիկ տեխնիկական նախապատրաստական աշխատանքները և ընդգծել ԵՄ անդամ պետությունների հետ համագործակցելու իր վճռականությունը՝ ապահովելու այս առաքելության արագ տեղակայումը:
Եվրոպացի պաշտոնյան նաև վերահաստատել է ԵՄ-ի լիակատար հանձնառությունը՝ նպաստելու երկու երկրների միջև լարվածության թուլացմանը և շարունակելու ջանքերն ամենաբարձր մակարդակներում՝ Հարավային Կովկասում կայուն խաղաղության հասնելու համար:
Տաթև Ֆռանգյան
