Բելառուսում հակաահաբեկչական գործողության ռեժիմ է սահմանվել․ լրատվամիջոցները հաղորդում են գաղտնի մոբիլիզացիայի մասին

Բելառուսը հակաահաբեկչական գործողության ռեժիմ է սահմանել՝ «հարևան պետությունների հնարավոր սադրանքների» մասին հաղորդումներից հետո։ Այս մասին Բելառուսի արտգործնախարար Վլադիմիր Մակեյը հայտարարել է ռուսական «Իզվեստիա»-ին տված հարցազրույցում։

Նախարարը հայտնել է, որ երկրի ղեկավար Ալեքսանդր Լուկաշենկոն մի շարք հանդիպումներ է անցկացրել իրավապահ մարմինների հետ, որից հետո սահմանվել է հակաահաբեկչական գործողության ռեժիմը։

«Տեղեկություն կար, որ որոշ հարևան պետություններ սադրանքներ են ծրագրում՝ կապված Բելառուսի տարածքի որոշ հատվածների գրավման հետ կապված», – ասել է Մակեյը:

Բելառուսի ԱԳՆ ղեկավարը հավելել է, որ «ներկայիս իրավիճակում ոչ մի նման ազդանշան չպետք է մնա առանց համարժեք պատասխանի»։ Նրա խոսքով՝ երկրի զինված ուժերը, ուժային կառույցներն ու հատուկ ծառայությունները պատրաստ են «հետ մղել հարևան պետությունների ցանկացած սադրանք»։ Թե կոնկրետ ո՞վ է ծրագրում այդ «սադրանքները», բելառուս պաշտոնյան չի հստակեցրել՝ նշելով միայն, որ այսօր «աշխարհն այնքան անկանխատեսելի է դարձել, որ ոչ ոքի չենք կարող վստահել»։ Ե՞րբ և որքա՞ն ժամանակով է երկրում ներդրվել հակաահաբեկչական ռեժիմը, հարցազրույցում չի նշվում։

«Նաշա Նիվային» հայտնի է դարձել, որ Ալեքսանդր Լուկաշենկոն հիմնարար որոշում է կայացրել Բելառուսում քողարկված մոբիլիզացիա իրականացնել՝ մարտական ստորաբաժանումները համալրելու համար։ Այն ընթանալու է մարտական պատրաստության ստուգման քողի տակ։ Առաջին փուլում դա չի ազդի մեծ քաղաքների վրա, առաջին հերթին մոբիլիզացվելու է գյուղական բնակչությունը։

Նշվում է, որ մարտական ստորաբաժանումների լրացուցիչ համալրումը հնարավոր է դարձնում էսկալացիայի սցենարը Բելառուսի և Ուկրաինայի սահմանին։

Դեռևս անհայտ է, թե քանի քաղաքացու է ծրագրվել մոբիլիզացնել։

Տաթև Ֆռանգյան