Սպան որակավորում ստանալուց հետո կրկնակի ավելի աշխատավարձ կստանա․ կարող են դիմել նաև 6 ամիս ծառայած զինծառայողները․ Պապիկյան․ ՏԵՍԱՆՅՈՒԹ

Կառավարությունը նախատեսում է պայմանագրային զինվորական ծառայություն անցնելու գրավչությունն ու շահագրգռվածությունը բարձրացնելու նպատակով անմիջականորեն մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողների համար հավելավճար սահմանել:

ՀՀ պաշտպանության նախարար Սուրեն Պապիկյանը, ներկայացնելով «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասին» և «Զինվորական ծառայության և զինծառայողի կարգավիճակի մասին» օրենքում փոփոխություն և լրացումներ կատարելու մասին» օրենքների նախագծերի փաթեթը, նշեց, որ փաթեթով առաջարկվում է՝  հավելավճարի համար ատեստավորմանը մարտական խնդիրների իրականացման պլանավորման և վերահսկման գործառույթներ ունեցող պաշտոններ ներկայումս զբաղեցնող պայմանագրային զինծառայողները մասնակցելու են կամավոր, իսկ զինվորական պաշտոնների յուրաքանչյուր խմբում նախատեսված և համապատասխան գործառույթներ ունեցող պաշտոն առաջին անգամ զբաղեցնող կամ պահեստազորից կրկին զինվորական ծառայության ընդունվող զինծառողները ենթակա են լինելու ատեստավորման պաշտոնը զբաղեցնելու օրվանից ոչ շուտ, քան 3 ամիս և ոչ ուշ, քան 4-րդ ամիսը լրանալու օրը:

Նախարարն ընդգծեց, որ ատեստավորման արդյունքում պայմանագրային զինծառայողը որակավորում ստանալուց հետո կարող է վաստակել բարձր աշխատավարձ․ «Այդ աշխատավարձը նվազագույնը երկու անգամ ավելի է լինելու, քան այսօրվա աշխատավարձը»,- նշեց նախարարը:

Պապիկյանը հավելեց, որ ատեստավորման համար կարող են դիմել նաև 6 ամիս ծառայած զինծառայողները։

Մանրամասները՝ տեսանյութում։