21.04.2026 | 19:15
Պուտինը գիտի՝ ռուսամետ ուժերը ՀՀ-ում իշխանության չեն գա, ուզում է՝ ԱԺ մտնեն, ՌԴ-ի շահերը պաշտպանեն․ Միքայել Զոլյան. ՏԵՍԱՆՅՈՒԹ
ԵՄ-ն Թուրքիային մղում է նոր հակամարտության՝ կիրառելով երկակի ստանդարտներ․ Կիպրոսի նախագահ
Քաղաքականություն
12.10.2022 | 14:44
Կիպրոսի նախագահ Նիկոս Անաստասիադիսը ԵՄ-ին մեղադրել է Թուրքիայի նկատմամբ երկակի ստանդարտների կիրառման մեջ։ Այս մասին նա ասել է Euronews-ի հետ զրույցում։ Անաստասիադիսն ասել է, որ Թուրքիան ՆԱՏՕ-ի անդամ միակ երկիրն է, որը չի միացել ՌԴ-ի դեմ պատժամիջոցներին՝ հավելելով, որ Ուկրաինա ներխուժումից հետո թուրքական արտահանումը ՌԴ կտրուկ ավելացել է։
Նախագահի խոսքով՝ միությունը ցավալի սահմանափակումներ է դնում սեփական տնտեսության վրա, քննադատում է Կիպրոսին ռուսական նավթը տեղափոխելու համար, սակայն թույլ է տալիս Թուրքիային գործել իր շահերից ելնելով և նրան վերաբերվում է որպես թեկնածու երկրի։
«Ռուսական շուկայի վրա ուղղակի ազդեցություն չունեցող երկրներին քննադատելու և նրանց վրա ճնշում գործադրելու փոխարեն, ԵՄ-ն լավ կլիներ նայեր, թե որ երկրները կամ անդամության թեկնածուները կամ եվրոպական քաղաքական ընտանիքին պատկանող երկրները որևէ պատժամիջոցներ չեն կիրառում։ Ես կոնկրետ խոսում եմ Թուրքիայի մասին, որը փաստացի հեշտացնում է այնպիսի ապրանքների մատակարարումները, ինչպիսին է ռուսական պողպատը՝ Թուրքիայով Եվրոպա»,-ասել է Անաստասիադիսը։
Նա նաև նշել է, որ Թուրքիան անթույլատրելի հռետորաբանություն ու ճնշում է կիրառում իր երկրի ու Հունաստանի նկատմամբ։ Անաստասիադիսը գտնում է, որ Բրյուսելը պետք է զսպի Ռեջեփ Թայիփ Էրդողանի նման պահվածքը, հակառակ դեպքում, Եվրոպայում կարող է ևս մեկ հակամարտություն բռնկվել։
«Գործնականում անհնար է Ռուսաստանին պատասխանատվության ենթարկել միջազգային իրավունքը խախտելու համար, բայց երբ թեկնածու երկիրն այն խախտում է ԵՄ անդամ երկրի հետ կապված, չի կարելի ձևացնել, թե դա այնքան էլ կարևոր չէ։ Նման համբերատարություն դրսևորելով Թուրքիայի նկատմամբ՝ ԵՄ-ն միայն նրան մղում է վտանգավոր գործողությունների ու ստեղծում Եվրոպայի ներսում նոր հակամարտության վտանգ»,-ասել է Կիպրոսի նախագահը։
Էմմա Չոբանյան
