09.05.2024 | 00:22
Ինչ են քննարկել Փաշինյանն ու Պուտինը
Պատերազմի մեկնարկից ի վեր ՌԴ-ն կես միլիարդ դոլարի հացահատիկ է գողացել Ուկրաինայից․ Associated Press-ի հետաքննությունը
Քաղաքականություն
04.10.2022 | 13:57
Ռուսաստանը պատերազմի մեկնարկից ի վեր առնվազն 530 մլն դոլարի ուկրանական հացահատիկ է գողացել։ Նման եզրահանգման է եկել Associated Press գործակալությունը հետաքննության արդյունքում, որի շրջանակում լրագրողներն ուսումնասիրել են արբանյակային լուսանկարներ, փաստաթղթեր, տվյալներ, նաև սոցցանցերի հաղորդագրությունները, փոխանցում է Meduza-ն։
Նշվում է, որ լրագրողները կարողացել են հացահատիկով լի ավելի քան 50 բեռների տեղափոխման հետևել Ուկրաինայի օկուպացված շրջաններից դեպի Թուրքիայի, Սիրիայի, Լիբանանի և այլ երկրների նավահանգիստներ, որոնք կազմել են մոտ 30 նավ։ Որպես օրինակ՝ լրատվամիջոցը հետաքննության մեջ մանրամասն վերլուծում է «Լաոդիկիա» նավի երթուղին։ Հուլիսի վերջին այն խարիսխ է նետել Լիբանանի Տրիպոլի նավահանգստային քաղաքում։ Այդ երկրի իշխանություններն այնուհետ հերքել են Ուկրաինայի այն պնդումները, թե նավը գողացված հացահատիկ է տեղափոխում։
Պաշտոնապես նշվում էր, որ ապրանքները նավ են բեռնվել Ռոստովի մարզի «Կավկազ» նավահանգստում, սակայն արբանյակային լուսանկարները ցույց են տալիս, որ նավն իրականում մեկնել է Ղրիմի Թեոդոսիայից: Այնտեղ էլ հացահատիկը, հավանաբար, հասել է Մելիտոպոլից, որը գրավվել է ռուսական զորքերի կողմից պատերազմի առաջին օրերին, մասնավորապես, նույն պարկերը տեսանելի են Մելիտոպոլում արված տարբեր տեսանյութերում և Լիբանանում բեռնաթափման ժամանակ նկատելի են նույնական պարկեր։
Ըստ AP-ի՝ մաքսանենգության մեջ ներգրավված է եղել նաև «Միացյալ նավաշինարարական կորպորացիան»: Իր դուստր Crane Marine Contractor-ի միջոցով կորպորացիան երեք բեռնատար նավ է գնել ներխուժմանը նախորդող շաբաթների ընթացքում: Այնուհետև դրանք առնվազն 17 ուղևորություն են իրականացրել Ղրիմի և Թուրքիայի ու Սիրիայի նավահանգիստների միջև։
Հետաքննության հեղինակները նշում են, որ գողացված հացահատիկը ստացողները կարող են լինել նաև Թուրքիայի իշխանությունները։ Տրանսպոնդերի և արբանյակային պատկերների տվյալները ցույց են տալիս, որ ուկրաինական հացահատիկ տեղափոխող նավերը խարսխված են եղել գյուղատնտեսական ապրանքներ ներմուծող և արտահանող պետական ձեռնարկության՝ Թուրքիայի հացահատիկի վարչության կողմից շահագործվող վերելակների նավամատույցների մոտ:
Միաժամանակ, Թուրքիայի ԱԳՆ-ն դեռ հունիսին հայտարարել էր, որ, իբր, Անկարան հացահատիկի ապօրինի արտահանման ապացույցներ չի գտել։
Էմմա Չոբանյան
