25.06.2026 | 23:51
Արմեն Մելիքբեկյանը մտադիր չէ առաջադրվել ՀՖՖ նախագահի ընտրություններում
Հյուսիսային Կորեան կրկին բալիստիկ հրթիռ է արձակել Ճապոնական ծովի ուղղությամբ․ ԵՄ-ն սա որակել է որպես տարածաշրջանի անվտանգությանը սպառնալիք
Քաղաքականություն
04.10.2022 | 13:33
Հյուսիսային Կորեան կրկին բալիստիկ հրթիռ է արձակել Ճապոնական ծովի ուղղությամբ։ Այս մասին հաղորդում է Yonhap գործակալությունը՝ վկայակոչելով հարավկորեացի զինվորականներին։
Եվրոպական խորհրդի ղեկավար Շառլ Միշելը հայտարարել է, որ ԵՄ-ն դատապարտում է Հյուսիսային Կորեայի կողմից բալիստիկ հրթիռի արձակումը Ճապոնիայի վրայով և այն դիտարկում է որպես սպառնալիք տարածաշրջանային անվտանգությանը։
Ճապոնիայի կառավարության տվյալներով՝ Հյուսիսային Կորեան երեքշաբթի առավոտյան հրթիռի արձակում է իրականացրել։ Այն թռել է Ճապոնիայի տարածքով և ընկել Խաղաղ օվկիանոսում՝ երկրի բացառիկ տնտեսական գոտուց դուրս՝ արշիպելագից 3,2 հազար կիլոմետր հեռավորության վրա։ Ճապոնացի փորձագետները կարծում են, որ ԿԺԴՀ-ի կողմից արձակված բալիստիկ հրթիռը հաղթահարել է արձակումների պատմության առավելագույն հեռավորությունը։
«Մենք խստորեն դատապարտում ենք Հյուսիսային Կորեայի կանխամտածված փորձը՝ վտանգի ենթարկել տարածաշրջանի անվտանգությունը՝ բալիստիկ հրթիռ արձակելով Ճապոնիայի վրայով: Սա չարդարացված ագրեսիա է և միջազգային իրավունքի կոպտագույն խախտում: ԵՄ-ն համերաշխ է Ճապոնիայի և Հարավային Կորեայի հետ»,- գրել է Միշելը:
Հավելենք, որ Հյուսիսային Կորեան կանոնավոր հրթիռներ է արձակում Ճապոնական ծովի ուղղությամբ, սակայն վերջին երկու շաբաթվա ընթացքում ԿԺԴՀ-ն կտրուկ ավելացրել է հրթիռների փորձարկումների թիվը։
Տաթև Ֆռանգյան
