21.04.2026 | 22:10
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
Մախաչկալայում մոբիլիզացիայի դեմ բողոքի ցույցերի ժամանակ շուրջ 100 մարդ է բերման ենթարկվել
Քաղաքականություն
26.09.2022 | 14:18
Կիրակի Ռուսաստանում շարունակվել են Ուկրաինայի դեմ պատերազմի համար մոբիլիզացիայի դեմ ինքնաբուխ բողոքի ցույցերը։ Մախաչկալայում մոբիլիզացիայի դեմ բողոքի ցույցերի ժամանակ ոստիկանությունն ավելի քան 100 ցուցարարի է ձերբակալել։
Դաղստանում մարդիկ փակել են մայրուղին և վանկարկել «Ո՛չ պատերազմին», իսկ ուժայիններն օդ են կրակել։ Յակուտիայում նույնպես մարդիկ հավաքվել են հրապարակում ու հակապատերազման կոչեր հնչեցրել։
Դաղստանում՝ Խասավյուրտի մոտակայքում գտնվող Էնդիրեյ մեծ գյուղի բնակիչները, բողոքելով մոբիլիզացիայի դեմ, փակել են Խասավյուրտ-Մախաչկալա մայրուղին։ Ավելի ուշ Մախաչկալայում սկսվել է բողոքի ակցիա՝ հիմնականում կանանց մասնակցությամբ։
https://t.me/chernovik/37585
Բողոքի ակցիայի մասնակից կանայք վիճել են ոստիկանների հետ՝ հայտարարելով, որ պատերազմը սկսել է Ռուսաստանը։
«Ռուսաստանը հարձակվել է Ուկրաինայի վրա։ Մենք կույր չենք»,- ասել են նրանք։
Կանայք նաև խնդրել են ոստիկաններին՝ չխանգարել իրենց բողոքի ակցիաներին։ Ներքին գործերի նախարարության աշխատակիցներից մեկը ստիպված է եղել փախչել ցուցարարներից։
Մախաչկալայում ոստիկանությունը ուժի կիրառմամբ ձերբակալություններ է իրականացրել։ Մի քանի տղամարդ ծեծի են ենթարկվել և տարվել ՆԳՆ վարչություն։ Կանանց նույնպես փորձել են բերման ենթարկել։ Ցուցարարները միաժամանակ փորձել են ազատել բերման ենթարկվածներին։ Ոստիկանների նկատմամբ ուժ է կիրառվել։ Երեկոյան ոստիկաններին միացել են նաև լրացուցիչ ջոկատներ, ժամանել է Ռոսգվարդիան։
Տաթև Ֆռանգյան
