Լուսադեմին ծանր վիճակ է եղել Ջերմուկում. Վահագն Արսենյան

«Ջերմուկում գիշերվանից մինչև առավոտյան 10-ը կրակոցները չեն դադարել: Առավել ծանր վիճակ լուսադեմին է եղել, թշնամին հրետակոծություն է սկսել: Այս պահին ինտենսիվությունը մի փոքր թուլացել է, սակայն չենք կարող ասել, թե հաջորդ պահին ինչ կլինի»,- այս մասին Factor.am-ի հետ զրույցում ասաց Ջերմուկ համայնքի ղեկավար Վահագն Արսենյանը:

Նրա խոսքով՝ կանայք ու երեխաները տարհանվել են, նրանք այս պահին ապաստարաններում են՝ ապահով վայրերում, իսկ ովքեր մնացել են քաղաքում՝ ինքնապաշտպանական ջոկատով միացել են Ջերմուկի պաշտպանությանը։

«Քաղաքում այս պահին գազ չկա, սակայն դա անջատվել է մեր կողմից՝ անվտանգության նկատառումներից ելնելով»,- նշեց Արսենյանը:

Նշենք՝ ժամեր առաջ Ադրբեջանի ԶՈՒ-ի կողմից թիրախավորվել էր Ջերմուկ քաղաքից դուրս եկող ճանապարհահատվածը, ինչի հետևանքով կրակահերթի տակ էր հայտնվել քաղաքացիական ավտոմեքենան: Վարորդը վիրավորում է ստացել և տեղափոխվել հիվանդանոց։

Հիշեցնենք՝ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառել է հրետանային միջոցներ, ականանետեր, ԱԹՍ-ներ և խոշոր տրամաչափի հրաձգային զինատեսակներ։ Ադրբեջանական ագրեսիայի հետևանքով հայկական կողմն ունի առնվազն 49 զոհ։ Բնակավայրերի հրետակոծության հետևանքով վիրավորում է ստացել նաև քաղաքացիական երեք անձ:

Սեպտեմբերի 13-ի լույս 14-ի գիշերը իրադրությունը հայ-ադրբեջանական սահմանին շարունակել է լարված մնալ։ Մասնավորապես՝ Ջերմուկի ուղղությամբ հակառակորդը կիրառել է հարվածային անօդաչու թռչող սարքեր։

Սեպտեմբերի 14-ին ժամը 08։00-ից սկսած, հակառակորդը, կիրառելով հրետանային միջոցներ, ականանետեր և խոշոր տրամաչափի հրաձգային զինատեսակներ, վերսկսել է նախահարձակ գործողությունները, մասնավորապես՝ Ջերմուկի և Վերին Շորժայի ուղղություններով։