27.07.2026 | 21:59
Հայաստանի մի շարք հասցեներում էլեկտրաէներգիայի անջատումներ կլինեն
ՀԱՊԿ նիստում առաջարկվել է գլխավոր քարտուղարին գործուղել հակամարտության գոտի
Քաղաքականություն
13.09.2022 | 23:16
ՀԱՊԿ Հավաքական անվտանգության խորհուրդն արտահերթ նիստում առաջարկել է կազմակերպության շրջանակներում ստեղծել աշխատանքային խումբ՝ իրավիճակը վերլուծելու և հայ-ադրբեջանական սահմանին իրավիճակի սրման հետ կապված առաջարկներ մշակելու համար։ Այս մասին երեքշաբթի հայտնել է ԲելՏԱ գործակալությունը՝ ամփոփելով հանդիպման արդյունքները, փոխանցում է ՏԱՍՍ-ը։
Գործակալության տվյալներով՝ հանդիպման ժամանակ առաջարկվել են քայլեր, որոնք կարելի է օպերատիվ կերպով ձեռնարկել։ Դրանց թվում՝ ՀԱՊԿ գլխավոր քարտուղար Ստանիսլավ Զասի մեկնումը հակամարտության գոտի՝ պետությունների ղեկավարների համար մանրամասն զեկույց պատրաստելու և իրավիճակը վերլուծելու համար։
Նշվում է, որ բելառուսական կողմից առաջարկները հնչեցվել են ՀԱՊԿ նիստում երկրի Անվտանգության խորհրդի պետքարտուղար Ալեքսանդր Վոլֆովիչի կողմից: Նախագահ Ալեքսանդր Լուկաշենկոն առցանց գագաթնաժողովին չի մասնակցել։
Հավելենք նաև, որ ՀԱՊԿ նիստն այսօր գումարվել է Հայաստանի նախաձեռնությամբ։ Օրակարգային հիմնական հարցերն էին հայ-ադրբեջանական սահմանի առանձին հատվածներում իրավիճակի սրումն ու իրավիճակի հանգուցալուծմանն օժանդակելը։
Նիստը տեղի է ունեցել ՀՀ վարչապետ Նիկոլ Փաշինյանի նախագահությամբ՝ տեսակոնֆերանսի ձևաչափով: Նիստին մասնակցել են նաև Ռուսաստանի Դաշնության նախագահ Վլադիմիր Պուտինը, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ժապարովը, Տաջիկստանի վարչապետ Կոխիր Ռասուլզոդան, Բելառուսի անվտանգության խորհրդի պետական քարտուղար Ալեքսանդր Վոլֆովիչը, ՀԱՊԿ գլխավոր քարտուղարի տեղակալ Վալերի Սեմերիկովը:
