19.12.2025 | 18:30
Ալեքսանդր Գրիգորյան․ Հիմա Սպերցյանը կարիերայի լավագույն մարզավիճակում է
ՆԱՏՕ-ն կոչ է անում անհապաղ դադարեցնել ռազմական գործողությունները և մտահոգություն հայտնում ՀՀ բնակավայրերի ուղղությամբ հարվածների կապակցությամբ
Քաղաքականություն
13.09.2022 | 14:33
Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան հայտարարել է, որ Հյուսիսատլանտյան դաշինքն անհանգստացած է Հայաստանի և Ադրբեջանի սահմանին ընթացող մարտական գործողություններով։
«Շատ անհանգստացած ենք Հայաստանի և Ադրբեջանի սահմանի երկայնքով հարձակումներից, այդ թվում՝ Հայաստանի բնակավայրերին և քաղաքացիական ենթակառուցվածքներին հասցված հարվածների մասին հաղորդումների կապակցությամբ: ՆԱՏՕ-ն անհապաղ ռազմական գործողությունների դադարեցման ու շտապ ապաէսկալացիայի կոչ է անում»,- ասվում է Կոլոմինայի թվիթերյան գրառման մեջ։
Հիշեցնենք՝ երեկ կեսգիշերին ադրբեջանական զինուժը լայնամասշտաբ ագրեսիա է ձեռնարկել ՀՀ սահմանների ուղղությամբ։ Իրավիճակը ժամը 14։00-ի դրությամբ որոշ ուղղություններով մնում է ծայրահեղ լարված․ հակառակորդը դիրքային առաջխաղացման փորձեր է իրականացնում 4 ուղղություններով՝ Ներքին Հանդի, Վերին Շորժայի, Արտանիշի և Սոթքի ուղղությամբ։
Թեև այսօր առավոտյան ՌԴ ԱԳՆ-ն հայտնել էր ժամը 10։00-ից հրադադարի մասին պայմանավորվածության մասին, սակայն հայկական կողմը պաշտոնապես չի հաստատել պայմանավորվածության փաստը, իսկ ՊՆ-ի վերջին հաղորդագրությունը ցույց է տալիս, որ հրադադարն առայժմ չի գործում։
Պաշտոնական տվյալներով՝ հայկական կողմն այս պահին 49 զոհ ունի։
Էմմա Չոբանյան
