Հիմքեր կան մտահոգվելու, որ ԼՂ-ին հայկական մշակութային ժառանգության ոչնչացում է սպառնում․ CHW-ի հետաքննությունը

Caucasus Heritage Watch (CHW)՝ «Կովկասյան ժառանգության մոնիթորինգ» հարթակը հրապարակել է հետազոտություն, որում ներկայացվել են մեկ տարի տևած հետաքննության արդյունքները։ Հետաքննության ընթացքում Caucasus Heritage Watch-ն օգտագործել է բարձր լուծաչափով արբանյակային պատկերներ՝ փաստաթղթավորելու Նախիջևանի հայկական մշակութային ժառանգության վայրերի ճակատագիրը:

Կազմակերպությունը պարզել է, որ միջնադարյան և վաղ ժամանակակից 108 հայկական վանքերը, եկեղեցիները և գերեզմանատներն ամբողջությամբ ավերվել են  1997-2011 թվականների ընթացքում:

Նշվում է, որ սա հայկական մշակութային ժառանգության վայրերի 98%-ն է, որոնք կազմակերպությունը կարողացել է գտնել և գնահատել։ Այս բացահայտումները վերջնական ապացույցներ են ներկայացրել այն մասին, որ մշակութային ժառանգության լուռ և համակարգված բնաջնջումը եղել է Ադրբեջանի ներքին էթնիկ քաղաքականության առանձնահատկությունը:

Ուսումնասիրության մեջ նշվում է, որ իզուր չէ մտավախությունը, որ Լեռնային Ղարաբաղում նույնպես մշակութային օբյեկտներ են ոչնչացվելու։ Արդեն փաստագրված է 6 ավերածություն, 7 վնաս և 17 հնարավոր սպառնալիք միայն 2020 թվականի պատերազմի սկզբից:

«Հիմքեր կան մտահոգվելու, որ հայկական մշակութային ժառանգության ոչնչացումը սպառնում է նաև Լեռնային Ղարաբաղին։ CHW-ն արդեն փաստագրել է 6 հաստատված ավերածություններ, 7 հաստատված վնաս և 17 սպառնալիքի տակ գտնվող օբյեկտներ՝ 2020 թվականի սեպտեմբերին Լեռնային Ղարաբաղում երկրորդ պատերազմի սկսվելուց հետո»,- ասված է կազմակերպության հետազոտության մեջ։

Տաթև Ֆռանգյան