Թուրքիայի և Սիրիայի հետախուզությունների ղեկավարները ՌԴ միջնորդությամբ հանդիպում են անցկացրել․ ԶԼՄ

Թուրքիայի և Սիրիայի հետախուզական կազմակերպությունների ղեկավարները հանդիպում են անցկացրել։ Այս մասին հաղորդում են թուրքական լրատվամիջոցները՝ վկայակոչելով ֆրանսիական հետախուզական Intelligence Online-ը։

Այս հանդիպումը տեղի է ունենում Անկարայի և Դամասկոսի միջև հարաբերությունների կարգավորման մասին լուրերի ֆոնին: Հաղորդվում է, որ հանդիպումը տեղի է ունեցել Ռուսաստանի միջնորդությամբ։ Չի նշվում, թե Թուրքիայի հետախուզության ղեկավար Հաքան Ֆիդանը և նրա սիրիացի գործընկեր Ալի Մամլուքը հանդիպումն անցկացրել են դեմ առ դեմ, թե՞ առցանց։

Լրատվամիջոցը հայտնում է հանդիպման «անբավարար» արդյունքները մասին՝ նշելով, որ այն «առնվազն թույլ է տվել երկու կողմերին որոշել իրենց պահանջները և ներկայացնել իրենց պայմանները»։ Ասվում է, որ Մոսկվան հովանավորել է հանդիպումը թուրքական կառավարության և սիրիական ռեժիմի միջև «միջնորդի դեր խաղալու» իր ջանքերի շրջանակում։

Օգոստոսին Թուրքիայի ԱԳ նախարար Մևլութ Չավուշօղլուն բացահայտել էր, որ անցյալ տարի Բելգրադում Չմիավորման շարժման կազմակերպության հանդիպումների ժամանակ հանդիպել է Սիրիայի արտգործնախարար Ֆեյսալ Մեքդադի հետ։ Նա նշել էր, որ իր սիրիացի գործընկերոջն ասել է, թե Սիրիայում խաղաղություն կարող է հաստատվել իշխանության և ընդդիմության համախմբմամբ։

Օգոստոսի սկզբին էլ Ռուսաստան այցից հետո Թուրքիայի նախագահ Թայիփ Էրդողանը հայտարարել էր, որ Ռուսաստանի նախագահ Վլադիմիր Պուտինը Թուրքիային առաջարկել է համագործակցել սիրիական կառավարության հետ իրենց համատեղ սահմանի երկայնքով։ Էրդողանը նաև պարբերաբար հայտարարում է Սիրիայում նոր ռազմական գործողություն իրականացնելու և 30 կմ-անոց անվտանգության գոտի ստեղծելու մասին։ Թուրքիան 2016 թվականից ի վեր արդեն 4 ռազմական գործողություն է իրականացրել Սիրիայում։

Էմմա Չոբանյան