Էրդողանն անցնում է «հարձակման ռեժիմի»՝ զգալով առաջիկա ընտրություններում անսպասելի շրջադարձը

Թուրքիայի իշխող «Արդարություն և զարգացում» կուսակցությունից նախարարները ծրագրում են նոր նպաստներ սահմանել, քանի որ նախագահ Ռեջեփ Թայիփ Էրդողանն օգոստոսի 23-ի իր ելույթում «անցել էր հարձակման ռեժիմի»՝ ընտրություններում անսպասելի շրջադարձ տեսնելուց հետո, գրում են թուրքական լրատվամիջոցները։

Մասնավորապես, ընտանիքի և սոցիալական ծառայությունների նախարար Դերյա Յանըքն ասել է, որ ընդլայնելու է սոցիալական նպաստների շրջանակը՝ ավելացնելով նոր տարրեր։ Ֆինանսների նախարար Նուրեդդին Նեբաթին էլ հայտարարել է, որ իր նախարարությունը նոր վարկային փաթեթ է պատրաստում։

Օգոստոսի 23-ին Էրդողանն ու նրա գլխավոր համախոհները հավաքվել են կուսակցության կենտրոնակայանում՝ արտահերթ հանդիպման՝ ուրվագծելու նախընտրական քարոզարշավը։ Կուսակցության անդամներն Էրդողանին ներկայացրել են հարցումների տվյալները։ Լրատվամիջոցների տեղեկություններով՝ Էրդողանը, տեսնելով, որ հարցումներում իր կուսակցությանն աջակցության անկումը դադարել է, կուսակիցներին հանձնարարել է պաշտոնների անցնել ընտրությունների մոտենալուն զուգընթաց։

Էրդողանի կոչից հետո ընտանիքի և սոցիալական ծառայությունների նախարարությունը սկսել է ժամանակավոր աշխատակիցների հավաքագրել 26 միլիոն տնային տնտեսություններ այցելությունների համար՝ սոցիալական նպաստների ներդրման շրջանակում։ Էրդողանի ելույթից հետո պոտենցիալ ընտրողներին իրենց կողմը գրավելու տարբեր քայլեր են ձեռնարկվում։

Նշվում է, որ նոր նպաստների մանրամասները կհայտարարվեն հոկտեմբերին՝ կառավարության նիստից հետո։

NTV-ի լրագրող Ահմեթ Էրգենի տեղեկատվության համաձայն՝ նպաստառուների շրջանակը կընդլայնվի, իսկ նպաստների չափը կբարձրացվի։ Ակնկալվում է, որ դրամական օգնություն կտրամադրեն ընտանիքներին կրթությունը շարունակող երեխաների համար, կառավարությունը նաև էներգետիկ աջակցություն կցուցաբերի։

Հավելենք, որ Թուրքիայում գնաճը հասել է վերջին 24 տարվա առավելագույնին՝ գերազանցելով 80 տոկոսը։ Երկրում սոցիալական լարվածությունը գնալով աճում է, որի հետ մեկտեղ՝ նաև անկում է ապրում Էրդողանի վարկանիշը։

մմա Չոբանյան