Քաղաքականություն
07.09.2022 | 21:21
Ալբանիայի կառավարությունը հայտարարել է Իրանի Իսլամական Հանրապետության հետ դիվանագիտական հարաբերությունները խզելու մասին և կարգադրել իրանցի դիվանագետներին՝ 24 ժամվա ընթացքում լքել Ալբանիայի տարածքը։ Այս մասին գրում է News.co.il-ը։
Նման կոշտ որոշման պատճառ են դարձել կիբերհարձակումների փորձերը, որոնց հետևում, ըստ պաշտոնական Տիրանայի, Իրանն է։
«Սա շատ լուրջ որոշում է, բայց այն համապատասխանում է հարձակման լրջությանը, որը սպառնում էր կաթվածահար անել հանրային ծառայությունները, ոչնչացնել տվյալների բազաները, թույլ տալ գողանալ պետական գաղտնիք ներկայացնող տեղեկատվություն: Դա երկրում քաոս կառաջացնի»,- ասել է Ալբանիայի վարչապետ Էդի Ռաման։
Ալբանիան իրանական ընդդիմության գործունեության կենտրոններից է, ինչի կապակցությամբ երկրում նկատվում էր Այաթոլլահի ռեժիմի գաղտնի ծառայությունների ակտիվությունը։ 2017 թվականին Իրանի դեսպանը և առաքելության մեկ այլ անդամ արտաքսվել են Տիրանայից՝ դիվանագետի կարգավիճակին չհամապատասխանող գործունեության համար։
ԱՄՆ Ազգային անվտանգության խորհրդի խոսնակ Ադրիեն Ուոթսոնն ասել է, որ նախագահ Ջո Բայդենի վարչակազմը խստորեն դատապարտում է Իրանի գործողությունները և կիսում է Ռամայի պահանջը՝ պատասխանատվության ենթարկել Իրանին ԱՄՆ դաշնակցի անվտանգությանը սպառնացող գործողությունների համար:
Տաթև Ֆռանգյան
