Եվրոպայում մեծանում են լուրջ էներգետիկ ճգնաժամի մտավախությունները

Էներգետիկ ճգնաժամն անհանգստություն է առաջացնում Եվրոպայում. ռուսական «Գազպրոմը» մի քանի օրով դադարեցրել է գազի մատակարարումը «Հյուսիսային հոսքով» (ինչպես հայտնել են ընկերությունից՝ վերանորոգման պատճառով)։

Սեպտեմբերի 1-ից հուլիսյան մատակարարումները չվճարելու պատճառով ֆրանսիական Engie կորպորացիան մնացել է առանց Ռուսաստանից մատակարարվող «կապույտ վառելիքի»։ Ֆրանսիայի վարչապետ Էլիզաբեթ Բորնը փորձել է հանգստացնել սպառողներին։ Նրա խոսքով՝ Engie-ն արդեն գտել է գազի այլ աղբյուրներ, իսկ թե որոնք են դրանք, կառավարության ղեկավարը չի հստակեցրել, գրում է Euronews-ը։

«Վառելիքի գների աճը և գազի պակասի իրական վտանգը ցույց են տալիս, որ մեր արժեքների պաշտպանությունը, դրա հետ մեկտեղ՝ ուկրաինացի ժողովրդի աջակցությունը, գին ունեն: Դա ասելը չի նշանակում խաղալ մեր վախերի վրա, դա նշանակում է՝ բացահայտ խոսել այն մասին, թե ինչի հետ ենք մենք բոլորս ստիպված բախվել»,- ասել է ֆրանսիացի պաշտոնյան։

ԵՄ ոչ բոլոր երկրներն են տառապում վառելիքի պակասից։ Հունգարիան սեպտեմբերի 1-ից պայմանագիր է կնքել «Գազպրոմի» հետ՝ օրական հավելյալ 5,8 մլն խմ գազի մատակարարման համար։

«Այս մատակարարման ավելացումը կնպաստի Հունգարիայի էներգետիկ անվտանգությանը և կօգնի խուսափել գազի պակասի պատճառով սահմանափակումների անհրաժեշտությունից»,- հայտարարել է Հունգարիայի արտաքին գործերի նախարար Պիտեր Սիյարտոն։

Գերպայմանագրային ծավալները կանցնեն «Թուրքական հոսք» գազատարով։ Ինչ վերաբերում է եվրոպական մյուս երկրներին, որոնք էներգետիկ կախվածության մեջ են Ռուսաստանից, նրանց համար այլընտրանքներից մեկն ամերիկյան հեղուկ գազն է։

Տաթև Ֆռանգյան