15.09.2026 | 10:56
Գալուզինը ԵՄ-ի՝ Հայաստանին տրված խոստումները «վերացական» է անվանել
Lufthansa-ն օդաչուների գործադուլի պատճառով 800 չվերթ է չեղարկել
Քաղաքականություն
01.09.2022 | 16:16
Գերմանական Lufthansa ավիացիոն կոնցեռնի օդաչուները սեպտեմբերի 2-ին մեկօրյա գործադուլ են նախատեսել, գրում է DW-ի ռուսական ծառայությունը։
Գործադուլը կհանգեցնի Գերմանիայից Lufthansa-ի և Lufthansa Cargo-ի կողմից իրականացվող 800 չվերթի չեղարկման, այսօր հայտնել է Մայնի Ֆրանկֆուրտում գտնվող Vereinigung Cockpit (VC) արհմիությունը: Կանխատեսվում է, որ գործադուլը կանդրադառնա շուրջ 130 հազար ուղևորի վրա:
Արհմիության ղեկավարությունը գործադուլը բացատրել է սակագնային համաձայնագրի շուրջ բանակցություններում առաջընթացի բացակայությամբ և տնօրինության՝ ընդառաջ չգնալու և հանդիպումից հրաժարվելու հանգամանքով։
«Գործադուլը կանխելու համար Lufthansa-ն պետք է շատ ավելի լավ առաջարկ անի»,- ասել է VC-ն:
Արհմիությունները պահանջում են 5,5 տոկոսով բարձրացնել օդանավի 5000 հրամանատարների և առաջին օդաչուների աշխատավարձերն արդեն այս տարի:
Lufthansa-ն պահանջներն անվանել է չափազանցված՝ նշելով, որ դրանց կատարման դեպքում ընկերության աշխատավարձը և անձնակազմի ծախսերն առաջիկա երկու տարում կավելանան ավելի քան 40 տոկոսով կամ 900 միլիոն եվրոյով, ինչը, ինչպես ընդգծվել է, բացարձակապես անընդունելի է։ Կոնցեռնի ղեկավարությունը նշել է, որ արհմիությանն առաջարկել է լավ և սոցիալապես հավասարակշռված փաթեթ և արհմիության ղեկավարությանը կոչ է արել վերադառնալ բանակցությունների սեղանի շուրջ։
Տաթև Ֆռանգյան
