Հրայր Թովմասյանն՝ ընդդեմ Վահե Գրիգորյանի. փաստաբաններն ահազանգում են՝ ՍԴ անդամի թեկնածության հետ կապված Թովմասյանի միջամտության մասին

Փաստաբան Երվանդ Վարոսյանն ահազանգում է՝ Վահե Գրիգորյանի թեկնածությունը՝ որպես Սահմանադրական դատարանի անդամի ներկայացրած փաստաբաններին տարբեր անձինք զանգում են՝ առաջարկելով հրաժարվել ստորագրություններից:

«Խնդրանք-առաջարկներ են հնչել հանել ստորագրությունները: Անուններ չեմ նշի, միայն կասեմ, որ այդ ամենի հեղինակը Հրայր Թովմասյանն է: Փորձում են միջամտել իր նախկին ենթակաները և իր հետ քավոր-սանիկական հարաբերություն ունեցողները»,- Factor.am-ի հետ զրույցում ասաց Երվանդ Վարոսյանը՝ նկատելով, որ այդ հանգամանքն արդեն խոսում է այն մասին, թե որքան անհրաժեշտ է Վահե Գրիգորյանի առաջադրումը Հայաստանի Հանրապետությանը:

Մեր հստակեցնող հարցին՝ կան փաստաբաններ, որոնք հրաժարվել են ստորագրություններից, Վարոսյանն արձագանքեց. «Էլ ի՞նչ փաստաբան, եթե զանգով պետք է ստորագրություն հետ վերցնի»: Փաստաբան Վարոսյանի տվյալներով՝ դիմումի տակ ընդհանուր առմամբ ստորագրել են 213 փաստաբան:

Հիշեցնենք, որ փաստաբանական համայնքը դիմել է ՀՀ նախագահ Արմեն Սարգսյանին՝ հորդորելով որպես ՍԴ անդամի դատավորի թեկնածու առաջադրել փաստաբան Վահե Գրիգորյանին: «Լավատեղյակ լինելով փաստաբան Վահե Գրիգորյանի բարձր մասնագիտական և անձնական հատկանիշներին և հատկապես սահմանադրական իրավունքի և արդարադատության ոլորտի նրա բարձր գիտելիքներին՝ վստահ ենք, որ նրա ընտրությունը ՀՀ Սահմանադրական դատարանի դատավորի պաշտոնում կնպաստի Դատարանի հեղինակության բարձրացմանը և նոր որակ կհաղորդի սահմանադրական արդարադատությանը Հայաստանում»,- ասված է փաստաբանների ներկայացրած դիմումում:

Ավելի վաղ հանրապետության նախագահը նամակով դիմել էր ԱԺ նախագահ Արա Բաբլոյանին Սահմանադրական դատարանի դատավորի թափուր տեղի համար առաջադրման հարցով: Նախագահ Արմեն Սարգսյանի օգնական Հասմիկ Պետրոսյանը Factor.am-ին փոխանցեց ԱԺ նախագահին ուղղված նամակը, որում ասվում է՝ «Սույն թվականի մարտի 23-ին պաշտոնավարման ժամկետի լրանալու կապակցությամբ դադարել են Սահմանադրական դատարանի անդամ Գագիկ Հարությունյանի լիազորությունները: Սահմանադրության 213-րդ հոդվածի համաձայն, Սահմանադրական դատարանի դատավորի թափուր տեղի համար առաջադրման իրավունքը տվյալ պարագայում վերապահված է հանրապետության նախագահին: Ելնելով Ազգային ժողովում նախորդ թեկնածուի ներկայացման ժամանակ հնչած առաջարկներից և քննադատություններից, ինչպես նաև այդ հարցով իմ ունեցած բազմաթիվ հանդիպումներից՝ եկել եմ այն եզրահանգման, որ թեկնածություն ներկայացնելիս անհրաժեշտ են հստակ խորհրդակցական մեխանիզմներ և ընթացակարգեր: Կարևորում եմ նաև հավուր պատշաճի քննարկումները իրավաբանական հանրության ներկայացուցիչների, ինչպես նաև շահագրգիռ այլ կողմերի հետ: Տեղեկացված եմ Սահմանադրական դատարանի դատավորի ընտրության ընթացակարգերի վերաբերյալ հասարակական կազմակերպությունների մտահոգություններին և առաջարկներին: Կարևորելով վերոշարադրյալը, ես պատրաստ եմ լսելու իրավաբանական հանրության ներկայացուցիչների կարծիքները՝ Սահմանադրական դատարանի բարձր դերին համապատասխանող դատավորի թեկնածությունների վերաբերյալ և Ազգային ժողովին առաջադրել Սահմանադրական դատարանի դատավորի թեկնածու: Որպես Հանրապետության նախագահ, որի հիմնական առաքելությունը Սահմանադրության պահպանմանը հետևելն է, վստահեցնում եմ, որ կձեռնարկեմ անհրաժեշտ բոլոր քայլերը ողջամիտ ժամկետներում այդ առաջադրումը կատարելու համար»:

Փորձեցինք Հասմիկ Պետրոսյանից ճշտել նաև Արմեն Սարգսյանի դիրքորոշումը Վահե Գրիգորյանի թեկնածության հետ կապված, տիկին Պետրոսյանը, սակայն, ծանոթ չէր նրա դիրքորոշմանը և նշեց, որ կփորձի ավելի ուշ ճշտել և արձագանքել:

Հիշեցնենք, որ մայիսի 4-ին Ազգային ժողովում տեղի ունեցած քվեարկության արդյունքում ՍԴ անդամի թափուր տեղի համար Հանրապետության նախագահի առաջադրած թեկնածուն՝ Էմիլ Բաբայանը, չընտրվեց: Համաձայն ԱԺ կանոնակարգի, եթե Սահմանադրական դատարանի դատավորը չի ընտրվում, ապա քվեարկությունից հետո, տասնօրյա ժամկետում, իրավասու մարմինն առաջադրում է նոր թեկնածու: