Թուրքիան չի ճանաչում Ղրիմի բռնակցումը և այդ քայլը համարում է անօրինական

Թուրքիան վճռական է շարունակելու միջնորդական ջանքերն ու քայլերը՝ Ուկրաինայում խաղաղություն հաստատելու համար։ Այս մասին հայտարարել է նախագահ Ռեջեփ Թայիփ Էրդողանը՝ ելույթ ունենալով Ղրիմի հարթակի գագաթնաժողովում առցանց ձևաչափով, փոխանցում է Անադոլու գործակալությունը։

Թուրքիայի ղեկավարը շնորհակալություն է հայտնել Ուկրաինայի նախագահ Վլադիմիր Զելենսկիին միջոցառմանը մասնակցելու հրավերի համար, ողջունել է պլատֆորմի գագաթնաժողովին միացած երկրների և կառավարությունների ղեկավարներին։

Էրդողանի խոսքով՝ Անկարան լիովին աջակցում և ճիշտ է համարում Ղրիմի համար խաղաղ ճանապարհով արդյունավետ պայքարին ուղղված հարթակ ստեղծելու գաղափարը։ Նա հիշեցրել է, որ Թուրքիայի աջակցությունը դրսևորվել է ԱԳ նախարար Մևլութ Չավուշօղլուի անձնական մասնակցությամբ անցյալ տարի Կիևում Ղրիմի պլատֆորմի առաջին հիմնադիր գագաթնաժողովին։

Էրդողանը վստահեցրել է, որ Թուրքիան կշարունակի աջակցել Ղրիմի պլատֆորմի աշխատանքին բոլոր մակարդակներում։
Նա շեշտել է, որ Թուրքիան չի ճանաչում Ղրիմի բռնակցումը, այդ քայլը համարում է անօրինական, ինչի մասին ինքը բացահայտ հայտարարում է իրադարձությունների առաջին իսկ օրվանից։

«Ղրիմի հարցում մեր երկրի դիրքորոշումը հիմնված է ոչ միայն օրենքի տառի վրա, այլև Անկարայի բարոյական դիրքորոշումների հիմնարար արտացոլումն է։ Ղրիմի վերադարձն Ուկրաինային նաև միջազգային իրավունքի պահանջ է։ Ուկրաինայի տարածքային ամբողջականության, ինքնիշխանության և քաղաքական միասնության պահպանումը չափազանց կարևոր է ոչ միայն տարածաշրջանի, այլև համաշխարհային անվտանգության և կայունության համար»,- ասել է Թուրքիայի նախագահը։

Էրդողանը Թուրքիայի առաջնահերթություններից է համարել Ղրիմի թաթարներից իր հայրենակիցների իրավունքների և անվտանգության պաշտպանությունը։

«Անկարան ուշադիր հետևում է Ղրիմում տեղի ունեցող գործընթացներին։ Այս կապակցությամբ ես կրկին կոչ եմ անում ազատ արձակել Ղրիմի թաթար ժողովրդի մեջլիսի առաջին պատգամավոր Նարիման Ջելալին և նրա համախոհներին, որոնք կալանավորվել են Ղրիմի պլատֆորմի առաջին գագաթնաժողովից հետո»,- ասել է թուրք քաղաքական գործիչը։

Տաթև Ֆռանգյան