27.02.2026 | 23:31
Ստեփանծմինդա-Լարս ավտոճանապարհը փակ է
42 երկրներ ՌԴ-ին կոչ են արել անհապաղ դուրս բերել զորքերը Զապորոժիեի ատոմակայանից
Քաղաքականություն
15.08.2022 | 12:21
Աշխարհի 42 երկրներ կոչ են արել Ռուսաստանին անհապաղ դուրս բերել զորքերը օկուպացված Զապորոժիեի ատոմակայանից, գրում է DW-ի ռուսական ծառայությունը։
«Ռուսական ռազմական անձնակազմի և զենքի տեղակայումն ատոմակայանում անընդունելի է: Սա անտեսում է անվտանգության կանոններն ու սկզբունքները, որոնք Ատոմային էներգիայի միջազգային գործակալության (ՄԱԳԱՏԷ) բոլոր անդամները պարտավորվել են հարգել։ Մենք կոչ ենք անում Ռուսաստանի Դաշնությանը՝ անհապաղ դուրս բերել իր ռազմական ուժերը և այլ չարտոնված անձնակազմը Զապորոժիեի ատոմակայանից, նրա շրջակայքից և ամբողջ Ուկրաինայից, որպեսզի օպերատորը և Ուկրաինայի իշխանությունները կարողանան կրկին կատարել իրենց ինքնիշխան պարտականություններն Ուկրաինայի միջազգայնորեն ճանաչված սահմաններում։ Դա նաև թույլ կտա ՄԱԳԱՏԷ-ին կատարել [ԱԷԿ-ի] ստուգումը ժամանակին և անվտանգ միջավայրում՝ Ուկրաինայի պարտավորություններին համապատասխան»,- ասվում է համատեղ հայտարարության մեջ:
Հայտարարությունն արվել է ԱՄՆ-ի, Մեծ Բրիտանիայի, Նորվեգիայի, Ավստրալիայի, Ճապոնիայի, Նոր Զելանդիայի և տասնյակ այլ երկրների, ինչպես նաև Եվրամիության անունից։
Տաթև Ֆռանգյան
