Ժամանակն է՝ Հունաստանը վերջապես պատժի այս մարդասպանին․ հունական լրատվամիջոցը՝ Ալիևի և Հյուսիսային Կիպրոսի ղեկավարի հանդիպման մասին

The Greek City Times-ն անդրադարձել է Ադրբեջանի նախագահ Իլհամ Ալիևի և Հյուսիսային Կիպրոսի ինքնահռչակ հանրապետության ղեկավար Էսին Թաթարի հանդիպմանը։

«Հյուսիսային Կիպրոսի թուրքական օկուպացիայի առաջնորդ Էրսին Թաթարը Թուրքիայի Իկոնիոնում (թուրք.՝ Քոնիա) հանդիպել է Ադրբեջանի ցեղասպան բռնապետ Իլհամ Ալիևի հետ։ Թաթարը նախագահ Ռեջեփ Թայիփ Էրդողանի հրավերով մեկնել է Քոնիա՝ մասնակցելու Իսլամական համերաշխության 5-րդ խաղերի բացման արարողությանը։ Թաթարը հանդիպել է նաև Ալիևին, բանակցությունները տևել են շուրջ 40 րոպե։ Հանդիպման ընթացքում Թաթարն Ալիևին տեղեկացրել է Կիպրոսի մասին և ասել, որ իրենք Թուրքիայի հետ վարում են ներդաշնակ քաղաքականություն»,- գրում է լրատվամիջոցը։

Նշվում է, որ ըստ Թաթարի՝ հանդիպումն անցել է շատ անկեղծ մթնոլորտում։ Հյուսիսային Կիպրոսի առաջնորդը նշել է, որ «գնահատականներ են տրվել երկու երկրների միջև փոխադարձ հարաբերությունների զարգացման վերաբերյալ»։

Հունական լրատվականը գրում է, որ բռնապետ, մարդասպան ու կոռումպացված Ալիևը լեգիտիմացրել է կեղծ պետությունը։

«Ժամանակն է, որ Հունաստանը վերջապես պատժամիջոցներ սահմանի այս մարդասպանի նկատմամբ, որը գնում է Արևմուտքի խիղճը՝ առնվազն 3 մլրդ դոլարով կաշառելով արևմտյան քաղաքական գործիչներին ու պաշտոնյաներին»,- նշում է հոդվածագիրը։

Հիշեցնենք, որ Արցախյան 44-օրյա պատերազմից հետո Բաքուն բավական սերը կապեր է հաստատել Հյուսիսային Կիպրոսի հետ։ Իսկ անցյալ տարի Ադրբեջանի խորհրդարանական պատվիրակությունն առաջին անգամ այցելել էր Հյուսիսային Կիպրոս։

Էմմա Չոբանյան