16.09.2026 | 16:54
Քաղցրաշենի մանկապարտեզի շենքում օձ է նկատվել․ երեխաներին տարհանել են
Ուկրաինայում սպանվել կամ վիրավորվել է մինչև 80 հազար ռուս զինվոր․ Պենտագոն
Քաղաքականություն
09.08.2022 | 19:19
Ուկրաինայում պատերազմի սկզբից ի վեր 70-80 հազար ռուս զինծառայող է զոհվել կամ վիրավորվել։ Այս մասին լրագրողներին հայտնել է ԱՄՆ պաշտպանության փոխնախարար Քոլին Քալը՝ ընդգծելով, որ խոսքը մարտի դաշտում թե՛ զոհվածների, թե՛ վիրավորների մոտավոր կորուստների մասին է, գրում է DW-ի ռուսական ծառայությունը։
«Այդ ցուցանիշը կարող է լինել մի փոքր ցածր կամ ավելի բարձր, բայց ես կարծում եմ, որ այս տվյալները ճիշտ են»,- ասել է նա:
Միաժամանակ, Պենտագոնի ներկայացուցիչը նշել է, որ չնայած նման «տպավորիչ» կորուստներին՝ Ռուսաստանը չի հասել փետրվարի վերջին Ուկրաինա ներխուժման ժամանակ նախագահ Վլադիմիր Պուտինի հռչակած նպատակներից ոչ մեկին։
«Նրա հիմնական նպատակն էր՝ գրավել ամբողջ երկիրը, հասնել Կիևում իշխանափոխության և ոչնչացնել Ուկրաինան որպես անկախ, ինքնիշխան և ժողովրդավարական պետություն: Դրանցից ոչ մեկը տեղի չունեցավ», – ընդգծել է Քալը:
Նա խոստովանել է, որ ուկրաինական կողմը նույնպես կենդանի ուժի զգալի կորուստներ է կրել, սակայն ոչ մի թիվ չի ներկայացրել։
Նշենք, որ Մոսկվան և Կիևը չեն հայտնում պատերազմում զոհվածների թիվը։ ՌԴ Պաշտպանության նախարարությունը դրանց մասին վերջին անգամ հայտնել է մարտի 25-ին։ Այնուհետև պնդում էին, որ զոհվել է 1351 մարդ, վիրավորվել՝ 3825-ը։
Տաթև Ֆռանգյան
