13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Իրանը մարտից արգելակում է ԳՀՀԾ-ի վերականգնման համաձայնագրի կնքումը․ Բլինքեն
Քաղաքականություն
02.08.2022 | 13:21
Իրանի իշխանությունները մարտ ամսից չեն կարողանում կամ չեն ցանկանում ընդունել համաձայնագիրը, որը կվերականգնի իրանական միջուկային ծրագրի վերաբերյալ Գործողությունների համատեղ համապարփակ ծրագիրը։ Այս մասին հայտարարել է ԱՄՆ պետքարտուղար Էնթոնի Բլինքենը, գրում է swissinfo-ն։
«Չնայած Իրանը հրապարակայնորեն արտահայտվել է ԳՀՀԾ-ի օգտին, մարտից Իրանը կա՛մ չի ցանկանում, կա՛մ չի կարողանում համաձայնվել այդ նպատակին հասնելու գործարքին»,- ասել է նա։
Բլինքենը նշել է, որ ԳՀՀԾ-ի վերականգնումն իրադարձությունների լավագույն զարգացումը կլիներ ԱՄՆ-ի, Իրանի և ամբողջ աշխարհի համար։
Հավելենք, որ ԱՄՆ նախագահ Ջո Բայդենն էլ հայտարարել էր, որ դաշնակիցների ու տարածաշրջանային գործընկերների հետ մշակել են առաջարկ՝ ապահովելու փոխադարձ վերադարձ Գործողությունների համատեղ համապարփակ ծրագրի ամբողջական իրականացմանը, երաշխավորելու, որ Իրանը միջուկային զենք ձեռք չի բերի։
Գործողությունների համատեղ համապարփակ ծրագիրը (ԳՀՀԾ) քաղաքական համաձայնագիր է, որը ստորագրվել է 2015 թվականի հուլիսի 15-ին Իրանի և մի խումբ պետությունների միջև՝ Իրանի միջուկային ծրագրի վերաբերյալ։ Խումբը բաղկացած է ԱՄՆ-ից, Ռուսաստանից, ՉԺՀ-ից, Մեծ Բրիտանիայից, Ֆրանսիայից՝ ՄԱԿ-ի Անվտանգության խորհրդի հինգ մշտական անդամներից, ինչպես նաև Գերմանիայից։
Էմմա Չոբանյան
