06.11.2024 | 17:19
Անցած տարիների ընթացքում Հայաստանի և ԱՄՆ-ի միջև հարաբերությունները գրանցել են աննախադեպ առաջընթաց․ Փաշինյանի ուղերձը՝ Թրամփին
Թուրք ընդդիմադիրները պնդում են՝ գործարանի աշխատողներին են պարտավորեցնում մասնակցել Էրդողանի հանրահավաքին մարդաշատությունն ապահովելու համար
Քաղաքականություն
22.07.2022 | 23:30
Թուրքիայի Kayseri Şeker շաքարի գործարանը հաղորդագրություն է ուղարկել իր բոլոր աշխատակիցներին՝ պարտավորեցնելով մասնակցել նախագահ Ռեջեփ Թայիփ Էրդողանի հանրահավաքին, որը տեղի է ունենալու այս շաբաթավերջին Կենտրոնական Անատոլիայի Կայսերի նահանգում, գրում են թուրքական լրատվականները։
Նշվում է, որ հաղորդագրությունը տարածել է ընդդիմադիր İYİ («Լավ») կուսակցության պատգամավոր Դուրմուշ Յըլմազը սոցիալական ցանցերում։
«Սիրելի ընկերներ, նախագահը գալիս է Կայսերի շաբաթ օրը։ Որպես Kayseri Şeker, ցույց տալու համար, որ մենք պետության կողքին ենք, դուք պետք է շաբաթ օրը ժամը 15.30-ին լինեք գործարանում: Ժամը 14:30-ին ծառայողական մեքենաները թողնում են իրենց կանոնավոր երթուղիները և հասնում գործարան: Կլինի ստուգում, որից հետո մենք կգնանք հրապարակ։ Հանրահավաքին մասնակցությունը պարտադիր է՝ բացառությամբ ամենամյա արձակուրդում և քաղաքից դուրս գտնվողների և շատ կարևոր պատճառաբանություններ ունեցողների։»,- ասվում է հաղորդագրության մեջ։
Գլխավոր ընդդիմադիր Ժողովրդահանրապետական կուսակցության Կայսերիի պատգամավոր Չեթին Արըքը այս առնչությամբ հայտարարություն է տարածել՝ նշելով, որ իշխող «Արդարություն և զարգացում» կուսակցությունը խուճապի մեջ է, քանի որ նրա շատ կողմնակիցներ հրաժարվել են կուսակցությանն աջակցելուց, և հանրահավաքի տարածքը դատարկ է լինելու։
«Ահա թե ինչու նրանք փորձում են հավաքել հանրահավաքի տարածքը՝ օգտագործելով հանրային իշխանությունը։ Այս աշխատողները ձեր ստրուկնե՞րն են։ Եթե դուք կանգնելու եք պետության կողքին, ապա կանգնելու եք ԱԶԿ-ի դեմ, որը Թուրքիան հասցրել է շաքար ներկրելու աստիճանի։ ԱԶԿ-ն պետությունը չէ», – ասել է պատգամավորը։
Էմմա Չոբանյան
