22.04.2026 | 13:08
UFC-ն հաստատել է Էդմեն Շահբազյանի ու Բրենդան Ալենի մենամարտը
Իրաքյան Քուրդիստանի վրա հարձակման համար քրդամետ կուսակցությունը մեղադրում է Էրդողանի կուսակցությանը
Քաղաքականություն
21.07.2022 | 23:04
Թուրքիայի քրդամետ Ժողովուրդների դեմոկրատական կուսակցությունը (HDP) իշխող նախագահ Ռեջեփ Թայիփ Էրդողանի «Արդարություն և զարգացում» կուսակցության (AKP) կառավարությանն է համարում նախօրեին Իրաքի Քուրդիստանում իննը խաղաղ բնակիչների սպանության «քաղաքական և իրավական պատասխանատուն», գրում է Turkish Minute-ը։
Հիշեցնենք, որ Զախո հանգստավայրում նախօրեին հրետակոծության հետևանքով զոհվել է 9 մարդ, վիրավորվել՝ առնվազն 23-ը։ Իրաքի իշխանությունները հարձակման մեջ մեղադրում են Թուրքիային։
DP-ն հայտարարություն է տարածել, որում կոչ է անում Թուրքիայի խորհրդարանի հրատապ նիստ հրավիրել։ «Քաղաքացիական բնակավայրերը ռմբակոծելը հանցագործություն է մարդկության դեմ և պատերազմական հանցագործություն: Թուրքիան դա արգելող միջազգային կոնվենցիաների անմիջական կողմն է։ Այս ջարդը նաև հարձակում է մեկ այլ երկրի ինքնիշխանության վրա: Հանցագործներն ու որոշում կայացնողները պետք է պատասխանատվության ենթարկվեն», – ասվում է հայտարարության մեջ։
Իրաքի վարչապետ Մուստաֆա ալ-Քադեմին զգուշացրել է Թուրքիային, որ Բաղդադն իրեն իրավունք է վերապահում «վրեժխնդիր լինել»՝ հրետանու կրակն անվանելով ինքնիշխանության «կոպիտ ոտնահարում»։ Թուրքիայի ԱԳՆ-ն, իր հերթին, հերքում է Անկարայի կողմից հրետակոծության փաստը՝ նշելով, որ հարձակման հետևում կանգնած են «PKK-ի ահաբեկիչները»։
Էմմա Չոբանյան
