22.04.2026 | 13:00
ՌԴ ԱԽ-ն հայտարարել է, թե ԵՄ-ին անդամակցելով՝ «Հայաստանը կկորցնի իր ՀՆԱ-ի 23 տոկոսը»
Կիևը Թեհրանին կոչ է արել չնպաստել Ռուսաստանի Դաշնության ագրեսիային
Քաղաքականություն
21.07.2022 | 15:44
Ուկրաինայի արտաքին գործերի նախարարությունը կոչ է արել Իրանին զերծ մնալ հայտարարություններից կամ քայլերից, որոնք «կնպաստեն Ուկրաինայի դեմ Ռուսաստանի ագրեսիային»։ Այս մասին հուլիսի 21-ին «Ինտերֆաքս-Ուկրաինա» գործակալությանը տված մեկնաբանությունում հայտնել է գերատեսչության խոսնակ Օլեգ Նիկոլենկոն։
«Ռուսաստանի Դաշնության դեմ իբր հարձակում նախապատրաստելու վերաբերյալ ցանկացած մեղադրանք անհիմն է և մանիպուլյատիվ։ Մենք կոչ ենք անում իրանական կողմին զերծ մնալ հայտարարություններից կամ քայլերից, որոնք կնպաստեն Ուկրաինայի դեմ Ռուսաստանի ագրեսիային»,- ասել է խոսնակը։
Նրա խոսքով, Կիևը մտահոգված է Թեհրանի կողմից հռետորաբանության փոփոխությամբ։
«Մենք ուշադրություն ենք դարձրել Իրանի ղեկավարության հայտարարություններին, որոնք անուղղակիորեն արդարացնում են Ուկրաինայի դեմ Ռուսաստանի Դաշնության ագրեսիան։ Ռուսաստանի Դաշնության լայնածավալ պատերազմի սկզբից ի վեր Իրանը հրապարակայնորեն հայտարարել է չեզոքության դիրքորոշում և հանդես է եկել հրադադարի և քաղաքական և դիվանագիտական կարգավորման օգտին: Այս համատեքստում ուկրաինական կողմը մտահոգված է հռետորաբանության փոփոխությամբ»,- ասել է Նիկոլենկոն։
Հավելենք, որ խոսքը գնում է այն մասին, որ Իրանի գերագույն առաջնորդ Ալի Խամենեին ՌԴ նախագահ Վլադիմիր Պուտինի հետ բանակցությունների ժամանակ ասել էր, որ եթե Ռուսաստանը չդադարեցներ ՆԱՏՕ-ի գործողություններն Ուկրաինայում, ապա որոշ ժամանակ անց դաշինքը պատերազմ կսկսի Ղրիմի պատրվակով։
Տաթև Ֆռանգյան
