Շվեդիայի Գերագույն դատարանը մերժել է Գյուլենական շարժման անդամին արտահանձնել Թուրքիային

Շվեդիայի Գերագույն դատարանը մերժել է  Գյուլենական շարժման ենթադրյալ բարձրաստիճան անդամ Յըլմազ Այթանի արտահանձնումը Թուրքիային, գրում են թուրքական լրատվամիջոցները։ Դատարանը մերժել է դիմումը՝ նշելով, որ Այթանի  գործունեությունը հանցակազմ չի պարունակում։

Թուրքիայի արդարադատության նախարարությունը Այթանի արտահանձնման դիմում է ներկայացրել Շվեդիային՝ նրան մեղադրելով զինված ահաբեկչական կազմակերպություն ստեղծելու ու ղեկավարելու մեջ։ Թուրքիայի իշխանությունները շարժանն են մեղադրում 2016թ-ին  պետական հեղաշրջում կազմակերպելու փորձի մեջ։

48-ամյա Այթանը եղել է Գյուլենի շարժման պարագլուխներից մեկը, որը  ղեկավարել է կազմակերպության դպրոցները Աֆղանստանում։ 2018 թվականից Շվեդիայում մշտական բնակության թույլտվություն ունենալով՝ նա շվեդական իշխանությունների կողմից ստացել է փախստականի կարգավիճակ։

Հավելենք, որ Թուրքիան Շվեդիայի ու Ֆինլանդիայի՝ ՆԱՏՕ-ի անդամակցության վետոն հանեց այն բանից հետո, երբ երեք երկրները հուշագիր ստորագրեցին, որի համաձայն Սկանդինավյան երկրները նաև Անկարային են արտահանձնելու «ահաբեկիչներին»։

Թուրքիան էլ գրավոր  հարցում է ուղարկել Շվեդիային և Ֆինլանդիային՝ պահանջելով արտահանձնել  «Քուրդիստանի աշխատավորական կուսակցության» և FETO-ի ՝ Գյուլենական շարժման ներկայացուցիչներին։

Շվեդիայի ԱԳ նախարար Անն Լինդեն և Ֆինլանդիայի ԱԳ նախարար Պեկկա Հաավիստոն էլ վստահեցրել էին, որ կատարելու են ահաբեկչության դեմ պայքարի վերաբերյալ Թուրքիայի հետ ձեռք բերված պայմանավորվածությունները, սակայն դրա հետ մեկտեղ չէին երաշխավորել քրդերի արտահանձնումը թուրքական դիմումների համաձայն։ Նրանք նշել էին, որ արտահանձնման որոշումը կայացնելու է դատարանը և գործընթացներն ընթանալու են երկրների օրենսդրությանը համապատասխան։

Էմմա Չոբանյան