Ադրբեջանի իշխանությունների խտրական քաղաքականության դրսևորում է․ թալիշներին թույլ չեն տվել փառատոն անցկացնել

Ադրբեջանի իշխանությունները շարունակում են խտրական քաղաքականությունը երկրում բնակվող ազգային փոքրամասնությունների նկատմամբ։ Մասնավորապես, Աստարայի շրջանի գործադիր իշխանությունը թույլ չի տվել ֆոլկլորային փառատոն անցկացնել, որը նախաձեռնել է Խամոշամ գյուղի քաղաքային խորհուրդը․ այստեղ ապրում են էթնիկ թալիշներ։ Ադրբեջանի Թալիշների հանրային խորհուրդը սա դիտարկում է, որպես իշխանությունների խտրական քաղաքականության դրսևորում թալիշ ժողովրդի նկատմամբ, գրում «Кавказский Узел»-ը։

«Փառատոնը նախատեսվում էր անցկացնել հուլիսի 16-ին Բի լեռնային սարահարթում։ Կազմակերպիչները պատրաստել էին բազմաբնույթ ծրագիր, որը ներառում էր տարածքում հայտնաբերված հնագույն գործիքների և կենցաղային իրերի ազգագրական ցուցահանդես, երաժշտական կատարումներ, բանահյուսական համույթների, պարային խմբերի ելույթներ, սպորտային մրցույթներ և այլն։ Նաև փառատոնի շրջանակում նախատեսվել էր ներկայացնել ազգային ու թալիշական խոհանոցի ուտեստներ, լեռնային ուտեստների նմուշներ»,- լրատվամիջոցին պատմել են փառատոնի կազմակերպիչները։

Սակայն գործադիր իշխանությունները հրաժարվել են փառատոնն անցկացնելու թույլտվություն տալ։ Պաշտոնական նամակում նշվում է, որ «փառատոնի տարածքն ընդգրկում է մասնավոր հողեր» և գտնվում է «բարդ լեռնային տեղանքում»։ Նաև որպես մերժման պատճառ նշվել է հանրակացարանների և հյուրանոցների բացակայությունը։

Ադրբեջանի թալիշների հանրային խորհուրդը, սակայն, իշխանությունների փաստարկները համարում է «ոչ անկեղծ ու մտացածին»՝ դա գնահատելով որպես «Ադրբեջանի իշխանությունների ազգային խտրական քաղաքականության դրսևորում թալիշ ժողովրդի նկատմամբ»։

«Պատահական չենք համարում փառատոնի անցկացմանն այսպես խոչընդոտելը։ Մենք դա դիտարկում ենք որպես Ադրբեջանի կառավարության քաղաքականության բաղկացուցիչ մաս, որն ուղղված է երկրի բնիկ ժողովրդի՝ թալիշների լեզվի, մշակույթի անտեսմանը։ Մենք դատապարտում ենք նման վերաբերմունք, որը հակասում է Ադրբեջանի Սահմանադրությանն ու օրենքներին»,- լրատվամիջոցին ասել է խորհրդի անդամ Գիլալ Մամեդովը։

Հավելենք, որ դեռ 2019 թվականին Եվրոպայի խորհուրդը քննադատել էր Ադրբեջանում ազգային փոքրամասնությունների իրավունքների սահմանափակումները։ Կառույցը նշել էր, որ  ազգային փոքրամասնությունների՝ իրենց կարծիքն արտահայտելու իրավունքը սահմանափակ է, նաև դժվարություններ են ունենում մայրենի լեզվով սովորելու հարցում։ Այն ժամանակ «Թալիշոն սադո» թերթի գլխավոր խմբագիր Ռաֆիգ Ջալիլովը նշել էր, որ թալիշների խնդիրներն իրավացիորեն արտացոլված են զեկույցում։ Քաղաքագետ Թոգրուլ Ջուվարլին էլ ասել էր, որ ազգային փոքրամասնությունների իրավունքների սահմանափակումները հետևանք են Ադրբեջանում ժողովրդավարական ազատությունների ընդհանուր սահմանափակման։

Էմմա Չոբանյան