Ադրբեջանում մտահոգված են, որ Կասպից ծովը կարող է ցամաքել

Ադրբեջանում խիստ մտահոգված են Կասպից ծովի էկոլոգիական վիճակով, մակարդակի տատանումներով, որի հետևանքով ծովը բախվում է տարբեր սպառնալիքների։ Մասնավորապես, Բաքվում անցկացվող Կասպից ծովին նվիրված համաժողովի ընթացքում Ադրբեջանի ԳԱԱ ակադեմիկոս Ֆահրեդդին Գադիրովն ասել է, որ շարունակում է հրատապ խնդիր մնալ Կասպից ծովի և հարակից տարածաշրջանի երկրաբանական ու բնապահպանական խնդիրների գիտական ​​ուսումնասիրությունը։

«Կասպից ծովում նավթի և գազի ինտենսիվ հետախուզման և արդյունահանման ֆոնին մենք բախվում ենք բազմաթիվ էկոլոգիական սպառնալիքների: Դրանք են՝ Կասպից ծովի մակարդակի տատանումները, երկրաբանական վտանգները՝ կապված ծովի հատակի դեֆորմացիաների հետ, ինչպես նաև էկոլոգիական խնդիրները՝ կապված աղտոտման հետ: Հրատապ խնդիր է նաև Կասպից ծովի ամենահարուստ կենսաբանական պաշարների պահպանումը։ Սրանք խնդիրներ են, որոնք սպասում են միասնական լուծման»,- ասել է Գադիրովը։

Նա հավելել է, որ ուսումնասիրությունների համաձայն՝ ծովի ջրի մակարդակը կտրուկ տատանվում է։

«Ուսումնասիրությունները ցույց են տալիս, որ 100 տարի առաջ Կասպից ծովի մակարդակը 2 մետրով բարձր էր։ 20-րդ դարի 30-ական թվականներին ջրի մակարդակը իջել է 1,5 մ-ով, իսկ 1978-1995 թվականներին գրանցվել է 2,7 մ բարձրացում։ 2005 թվականից ջրի մակարդակը տարեկան նվազում է 10 սմ-ով։ Կասպից ծովի հյուսիսարևելյան հատվածը կարող է արժանանալ Արալյան ծովի ճակատագրին, եթե այդ փոփոխությունները պահպանվեն 25-30 տարի»,- ասել է Գադիրովը։

Ադրբեջանի պետական նավթագազային SOCAR ընկերության փոխնախագահ Խալիկ Մամեդովն էլ ասել է, որ կլիմայի փոփոխությունից բխող արտակարգ իրավիճակները, ինչպես նաև Կասպից ծովի մակարդակի տատանումներն իրական ռիսկեր են

«Պրակտիկան ցույց է տալիս, որ ծովի մակարդակի անկման դեպքում տարածքը, որտեղ ապրում և զարգանում է Կասպիական կենդանական աշխարհը, կրճատվում է, և դժվարություններ են առաջանում հիդրոտեխնիկական կառույցների, այդ թվում՝ նավահանգիստների շահագործման մեջ։ Նման իրավիճակները խոչընդոտում են SOCAR-ի արտադրական տեղամասերի բնականոն գործունեությանը»,- ասել է Մամեդովը։

Էմմա Չոբանյան