22.04.2026 | 21:16
Ըմբշամարտի ԵԱ․ Սլավիկ Գալստյանը և Գասպար Տերտերյան՝ բրոնզե մեդալակիրներ. ՏԵՍԱՆՅՈՒԹ
Ջո Բայդենը հայտարարել է, որ աջակցում է Թուրքիային F-16-երի վաճառքին և վստահ է Կոնգրեսի հավանությունը ստանալու հարցում
Քաղաքականություն
30.06.2022 | 22:14
ԱՄՆ նախագահ Ջո Բայդենը հայտարարել է, որ Վաշինգտոնն աջակցում է Թուրքիային F-16 կործանիչների վաճառքին և վստահ է, որ Կոնգրեսի համաձայնությունը, որն անհրաժեշտ է վաճառքի համար, կարող է ստանալ, գրում է Reuters գործակալությունը։
ՆԱՏՕ-ի գագաթնաժողովի ավարտին Մադրիդում կայացած մամուլի ասուլիսում նա հերքել է ենթադրությունները, թե վաճառքին Վաշինգտոնի աջակցությունը Թուրքիայի կողմից Շվեդիայի և Ֆինլանդիայի՝ ՆԱՏՕ-ին անդամակցելու վետոն հանելու դիմաց է:
«Այն, ինչ ես ասացի, ասել եմ դեռ դեկտեմբերին․ մենք պետք է վաճառենք նրանց F-16 ինքնաթիռները և դրանց արդիականացման համակարգերը։ Մեզ ձեռնտու չէ դա չանելը։ Այստեղ չկա գործարք՝ գործարքի դիմաց։ Մենք պարզապես պետք է վաճառեինք, բայց ինձ պետք է Կոնգրեսի հաստատումը, որպեսզի կարողանամ դա անել: Եվ ես կարծում եմ, որ մենք կարող ենք դա ստանալ»,- ասել է Բայդենը։
Հավելենք, որ դեռևս հոկտեմբերին Թուրքիան ԱՄՆ-ին խնդրել էր վաճառել Lockheed Martin-ի արտադրության 40 միավոր F-16 և շուրջ 80 արդիականացման հավաքածու: Մարտին էլ Պետքարտուղարությունը նամակ էր գրել ԱՄՆ Կոնգրեսի որոշ անդամներին, որոնք դեմ էին վաճառքին՝ ասելով, որ ԱՄՆ-ի պաշտպանական առևտրային կապերը Թուրքիայի հետ ծառայում են Վաշինգտոնի շահերին:
Էմմա Չոբանյան
