Հաշմանդամություն ունեցող անձանց հանրապետական մարզական փառատոն՝ Գյումրիում․ ԼՈՒՍԱՆԿԱՐՆԵՐ

Այսօր Գյումրիում տեղի ունեցավ հաշմանդամություն ունեցող անձանց հանրապետական 19-րդ մարզական փառատոնի հանդիսավոր բացումը, որին մասնակցում են Երևանի և հանրապետության մարզերի ներկայացուցիչներ։ Փառատոնը տևելու է երեք օր։

ՀՀ Ազգային պարալիմպիկ կոմիտեի նախագահ Հակոբ Արբրահամյանը տեղեկացրեց, որ փառատոնին մասնակցում է ավելի քան 80 մարզիկ։ Նրանք մրցելու են 7 մարզաձևերում՝ ծանրամարտ, լող, սայլակներով բասկետբոլ, բոչա, շախմատ, թենիս, սայլակներով վազք։

Ըստ Աբրահամյանի՝ նման փառատոն Գյումրիում անցկացվում է առաջին անգամ։

Շիրակի մարզպետարանի մշակույթի և սպորտի բաժնի պետ Վաչագան Վարդանյանի տեղեկացմամբ էլ՝ այս փառատոնում նորություն է սայլակներով վազքը, որի համար որպես տեղանք ընտրվել է «Մայր Հայաստան» հուշահամալիրի տարածքը։

Հանդիսավոր բացումը կատարեց Հաշմանդամություն ունեցող անձանց ծանրամարտի ֆեդերացիայի նախագահ Գրետա Վարդանյանը։
Փառատոնը կազմակերպվել է ՀՀ Ազգային պարալիմպիկ կոմիտեի, Հաշմանդամություն ունեցող անձանց ծանրամարտի ֆեդերացիայի նախաձեռնությամբ՝ ԿԳՄՍ նախարարության աջակցությամբ։

Փառատոնին մասնակցում է նաև «Զինվորի տան» պարային խումբը, որի կատարմամբ էլ տրվեց մեկնարկը։

Կազմակերպիչները կարևորեցին պետության հոգածությունը հաշմանդամություն ունեցող անձանց տարբեր սպորտաձևերում ներգրավելու, նրանց ակտիվ կյանքի վերադարձնելու համար։ Ըստ նրանց՝ անհրաժեշտ է մարզադահլիճներն ու հանրապետության ենթակառուցածքները հարմարեցնել հաշմանդամություն ունեցող անձանց կարիքներին, հատկապես, որ նրանց թիվն ավելացել է 44-օրյա պատերազմից հետո։

Ըստ Ազգային պարալիմպիկ կոմիտեի նախագահ Հակոբ Աբրահամյանի՝ կան հնարավորություններ Հայաստանում միջազգային մրցումներ անցկացնելու համար, սակայն մեր երկրի ենթակառուցվածքները խնդիրներ են ստեղծում․ հյուրանոցները հարմարեցված չեն հաշմանդամություն ունեցող անձանց, տրանսպորտային միջոցները՝ նույնպես։

«Չունենք տրանսպորտային միջոցներ, որոնք կկարողանան սպասարկել մեծ թվով սայլակ օգտագործողների։ Եթե հիմա մենք որոշենք ծանրամարտի Եվրոպայի առաջնությունն անցկացնել Հայաստանում, խոսքը պարածանրամարտի մասին է, մոտ 300 սայլակ օգտագործող կգա, և մենք չենք կարողանա նրանց տեղավորել հյուրանոցներում և ապահովել տրանսպորտով»,- նշեց ՀՀ Ազգային պարալիմպիկ կոմիտեի նախագահը։

Արմիկ Մովսիսյան