Քաղաքականություն
27.06.2022 | 23:02
Թուրքիայի նախագահ Ռեջեփ Թայիփ Էրդողանին աջակցության մակարդակը հունիսին թեև բավական կայուն է մնում, հետազոտական MetroPoll ընկերության ամենամսյա հարցման մասնակիցների ավելի քան 50 տոկոսն ասել է, որ հավանություն չի տալիս Էրդողանի աշխատանքին՝ որպես նախագահ, գրում են թուրքական լրատվամիջոցները։
Ընդհանուր առմամբ, 51,6 տոկոսը հավանություն չի տալիս Էրդողանին, ինչը 4,3 տոկոսով ավելին է մայիսի տվյալներից։ Էրդողանի աջակցությունը նրա գլխավորած «Արդարություն և զարգացում» կուսակցության ընտրողների շրջանում բարձր է՝ 89,2 տոկոսն ասել է, որ հավանություն է տալիս: Սակայն ԱԶԿ-ի գործընկեր՝ ծայրահեղական աջ «Ազգայնական շարժում» կուսակցության (MHP) ընտրողների շրջանում նախագահի աջակցությունը նվազում է մինչև 66 տոկոս:
Ամենացածր ցուցանիշները գրանցվել են հիմնական ընդդիմադիր Ժողովրդահանրապետական կուսակցության ընտրողների շրջանում՝ 13 տոկոս, և քրդամետ Ժողովուրդների դեմոկրատական կուսակցության աջակիցների շրջանում՝ 19,7 տոկոս:
Metropoll ընկերությունը պարզել է, որ Էրդողանի աջակցության մակարդակն ապրիլի 53,6-ից մայիսին իջել է 47,3-ի, քանի որ Թուրքիան դեմ էր ՆԱՏՕ-ին Շվեդիայի և Ֆինլանդիայի միանալուն, իսկ հունիսին կրկին բարձրացել է՝ հասնելով 51,6 տոկոսի։
ՀակաՆԱՏՕ-ական դիսկուրսը չի ազդել հավանության վարկանիշի վրա, որը մայիսին 44 տոկոս էր։ Անցյալ տարվա դեկտեմբերին նախագահի վարկանիշն իջել էր 38,6 տոկոսի՝ Թուրքիայում շարունակվող տնտեսական ճգնաժամի պայմաններում։
Էմմա Չոբանյան
