08.06.2026 | 11:11
Ընտրությունների ընթացքում ստացվել է 619 ահազանգ, ձերբակալվել է 18 անձ․ ՆԳՆ
Զախարովան հայտարարել է, թե ՌԴ-ն կասկածում է Մինսկի խմբի աշխատանքի մասով ԱՄՆ պետքարտուղարի տեղակալի հայտարարությունների անկեղծությանը
Քաղաքականություն
22.06.2022 | 14:24
ՌԴ ԱԳՆ պաշտոնական ներկայացուցիչ Մարիա Զախարովան այսօրվա ճեպազրույցում անդրադարձել է ԱՄՆ պետքարտուղարի Եվրոպայի ու Եվրասիայի հարցերով տեղակալ Քարըն Դոնֆրիդի այն հայտարարություններին, որ Վաշինգտոնը կշարունակի աշխատանքը ԵԱՀԿ Մինսկի խմբում՝ չնայած Մոսկվայի հետ առկա խորը տարաձայնություններին։
«Ես կցանկանայի ինձ թույլ տալ կասկածի տակ դնել Քարըն Դոնֆրիդի հայտարարություների անկեղծությունը։ Եթե Վաշինգտոնն ու Փարիզը իսկապես կարևոր համարեին Մինսկի խմբի համանախագահների միջնորդական յուրահատուկ ձևաչափը, ապա նրանք փետրվարի 24-ին առանց խորհրդակցությունների չէին ընդհատի շփումները Մինսկի խմբի ռուսաստանցի համանախագահի հետ։ Այդպիսով, Մինսկի եռյակին հասցվել է անդառնալի վնաս։ Իսկ հիմա այսպիսի բաներ են հայտարարում։ Այս աղաղակող քայլի պատճառների մասին հստակ բացատրություն դեռ չի ստացվել։ Նմանապես, երաշխիք չկա, որ նման անպատասխանատու գործողությունները չեն կրկնվի»,- ասել է Զախարովան։
Նա ասել է, թե ձևացնել, որ ոչինչ չի եղել, չի ստացվի, պետք է հաշվի առնել նոր իրողությունները։ Ըստ Զախարովայի՝ ռուսական կողմը ամենաշահագրգիռն է Հայաստանի և Ադրբեջանի միջև հարաբերությունների կարգավորման հարցում։
«Ռուսական կողմը չի կարող թույլ տալ, որ առանձին արտաքին խաղացողների քաղաքականացված քայլերը խաթարեն տարածաշրջանում խաղաղության և կայունության վերականգնման ուղղությամբ առանց այն էլ դժվարին ջանքերը»,- հայտարարել է ՌԴ ԱԳՆ պաշտոնական ներկայացուցիչը։
Էմմա Չոբանյան
