ԱՄՆ նախկին նախագահ Բարաք Օբաման սխալ է համարել Իրանի միջուկային ծրագրի համաձայնագրից Վաշինգտոնի դուրս գալու մասին Դոնալդ Թրամփի որոշումը. փոխանցում է Interfax-ը։
«Ես վստահ եմ, որ Համատեղ գործողությունների համապարփակ ծրագիրը (ՀԳՀԾ) սպառնալիքի տակ դնելու որոշումը՝ առանց Իրանի կողմից համաձայնագրի խախտումների, լուրջ սխալ է։ Առանց ՀԳՀԾ-ի՝ ԱՄՆ-ը վերջնական արդյունքում կարող է պարտված դուրս գալ Իրանի ձեռքում միջուկային զենքի և Մերձավոր Արևելքում պատերազմի միջև ընտրության հարցում»,- ասվում է նախկին նախագահի հայտարարությունում։
Հիշեցնենք, որ նախօրեին ԱՄՆ նախագահ Դոնալդ Թրամփը Սպիտակ տանը հայտարարել էր, որ երկիրը դուրս է գալիս Իրանի միջուկային ծրագրի համաձայնագրից։
