20.11.2024 | 15:16
Էստոնիան հանձնառու է աջակցել Հայաստանին ԵՄ-ի հետ հարաբերությունների սերտացման հարցում․ դեսպանը՝ Ռուբինյանին
Ալիևը հայտարարել է, թե «Մինսկի խմբի թոշակի գնալու ժամանակն է»
Քաղաքականություն
16.06.2022 | 13:42
Ադրբեջանի նախագահ Իլհամ Ալիևը կոչ է արել Հայաստանին «դադարեցնել շահարկել ԵԱՀԿ Միսնկի խմբի թեման», գրում են ադրբեջանական լրատվամիջոցները։ Նա կրկին ադրբեջանական թեզն է հնչեցրել, թե ,իբր, Լեռնային Ղարաբաղի հակամարտությունը կարգավորվել է։
«Այն բանից հետո, երբ Ադրբեջանը կարգավորեց Ղարաբաղյան հակամարտությունը, Մինսկի խմբի կարիքը չկա»,-ասել է Ալիևը Բաքվի գլոբալ ֆորումի իր ելույթում։
Նա նշել է, որ ռուս-ուկրաինական պատերազմից հետո բոլորը հասկանում են ԵԱՀԿ Մինսկի խմբի երեք համանախագահների (ՌԴ, ԱՄՆ, Ֆրանսիա) շփումների անհնարինությունը։
«Մենք արդեն ստացել ենք մեսիջներ, որ Մինսկի խմբի ինստիտուտը այլևս չի գործելու։ Արդեն նրանց թոշակի գնալու ժամանակն է։ Ես մեկ անգամ ցանկանում եմ արտահայտել իմ դիրքորոշումը, որ Հայաստանում կամ այլ երկրում Մինսկի խմբի վերաբերյալ որևէ շահարկում Ադրբեջանին միայն նյարդայնացնում է։ Մենք լուծել ենք հակամարտությունը։ Մինսկի խմբի կողմից մշակված Մադրիդյան սկղբունքները լուծվել են։ Հիմա պետք է մտածել Հայաստանի հետ հարաբերությունների կարգավորման մասին ու ստորագրել խաղաղության պայմանագիր»,-ասել է Ալիևը։
Բացի այդ՝ Ալիևը նաև հայտարարել է, որ վրացական կողմի հետ քննարկել են Հայաստանի հետ եռակողմ հանդիպում անցկացնելու առաջարկը։
«Վրաստանի կառավարությունը աջակցում է Ադրբեջանի, Վրաստանի ու Հայաստանի ԱԳ նախարարների եռակողմ հանդիպման գաղափարը՝ երկխոսություն սկսելու համար։ Ցավոք, հայկական կողմը հրաժարվում է»,- հայտարարել է Ադրբեջանի նախագահը։
Էմմա Չոբանյան
