Մեծի Տանն Կիլիկիո կաթողիկոս Արամ Ա-ն շնորհավորական ուղերձ է հղել ՀՀ նորընտիր վարչապետ Նիկոլ Փաշինյանին. այս մասին տեղեկանում ենք կաթողիկոսարանի պաշտոնական կայքէջից։
Սիրելի՛ պարոն Փաշինյան,
Մեծի Տանն Կիլիկիո Կաթողիկոսության Անթիլիասի մայրավանքից Հայրապետական օրհնությամբ, քրիստոնեական ջերմ սիրով ու ազգային վառ ապրումներով ողջունում ենք Ձեր՝ ՀՀ վարչապետի պաշտոնում ընտրվելը: Արդարև Դուք երկրի վարչապետի պաշտոնը ստանձնում է Հայաստանի համար հույժ կարևոր մի ժամանակաշրջանում։ Մենք հետևում էինք Ձեր առաջնորդած ժողովրդական շարժումը և գնահատեցինք Ձեզ, երբ ժողովրդին հետ պահեցիք բռնարարքներից ու արյունահեղությունից և սիրո ու համերաշխությունը ոգին դարձրեցիք ժողովրդական շարժման շարժիչ ուժը։
Սիրելի՛ պարոն վարչապետ,
Ժողովրդի թեկնածու լինելը մեծ պատիվ է ու միաժամանակ՝ ծանր պարտավորություն։ Մենք ակնկալում ենք, որ Ձեր տված խոստումները, բարոյական արժեքների ու մարդու իրավունքների ամուր պահպանմամբ, կյանքի կկոչեք։ Ակնկալում ենք, որ հայրենի մեր ժողովրդի, Արցախի ու մեր ազգի գերագույն շահերն ու ձգտումները քաղաքական նկատառումներից վեր կդասեք և մեկ ազգի ու հայրենիքի անխախտ սկզբունքին՝ Հայաստան-Սփյուռք համագործակցությանը նոր ծավալ ու որակ հաղորդելով՝ այն կդարձնեք Ձեր կյանքի ու գործունեության շարժիչ ուժը։
Ջերմորեն շնորհավորում ենք Ձեր ընտրությունը, մշտապես մնալու ենք աջակից Ձեզ ու Ձեր գլխավորած կառավարությանը, ինչպես նաև գործնական մասնակիցը հայրենաշինության առաքելությանը: Աղոթում ենք, որ Բարձրյալ Աստված զորացնի Ձեզ, որպեսզի կարողանաք հաջողությամբ իրագործել Ձեր հայրենանվեր ծրագրերը։
