Ռուսական ավիաընկերությունները դիտարկում են Թուրքիա տեղափոխվելու հնարավորությունը

Ռուսական ավիաընկերությունները դիտարկում են Թուրքիա տեղափոխվելու հարցը՝ կանխելու Ուկրաինա ներխուժման պատճառով արևմտյան պատժամիջոցների կիրառումը ռուսական ինքնաթիռների նկատմամբ։ Այս մասին հայտնում է  Bloomberg-ը, որին վկայակոչում է «Ահվալ» գործակալությունը։

Նշվում է, որ Pegas Touristik-ը, որին պատկանում են Nordwind Airlines-ը և Anex Tourism-ը, որը շահագործում է Azur Air-ը, քննարկում են Թուրքիայում ավիաընկերությունների հիմնման հարցը։

Ընկերությունները կապի մեջ են լիզինգային ընկերությունների հետ ինքնաթիռներ ձեռք բերելու համար։ Այս մասին հայտնում է լրատվամիջոցը՝ վկայակոչելով անանուն աղբյուրների, որոնք տեղյակ են իրավիճակից։

Հավելենք, որ արևմտյան երկրները պատժամիջոցներ են սահմանել ՌԴ-ի դեմ, նաև փակել իրենց օդային տարածքը։ Սակայն Թուրքիան հակառուսական պատժամիջոցներ չի սահմանել։

Azur Air-ը և Nordwind-ը, որոնք երկուսն էլ թուրք գործարարների կողմից վերահսկվող ավելի մեծ զբոսաշրջային ընկերությունների մաս են կազմում, հիմնականում ռուսների են տեղափոխում զբոսաշրջային ուղղություններով։ Bloomberg-ի աղբյուրների համաձայն՝ երկու փոխադրողներն առանձին-առանձին չեն արժանացել Արևմուտքի կողմից պատժամիջոցների, ուստի այդ քայլը չի խախտի որևէ կանոն։

Նշվում է, որ Anex-ը կարող է նոր միավոր տեղակայել Թուրքիայի հարավային Անթալիայում՝ երկրի գլխավոր զբոսաշրջային կենտրոններից մեկում, իսկ Pegas-ը կարող է հիմնել Southwind կոչվող ավիաընկերություն։ Նոր ընկերությունները կարող են գործունեությունը սկսել արդեն այս ամառ։

Մինչև ռուսական ներխուժումը՝ Azur Air-ն ուներ 34 ինքնաթիռ, իսկ Nordwind-ը՝ 28։

Թուրքիան էլ ձգտում է զբոսաշրջիկների ներգրավել Ռուսաստանից, որպեսզի օգնի խթանել արտարժույթով եկամուտները և տնտեսական աճը:

Էմմա Չոբանյան