Թուրքիայում սիրիացի տարեց կին փախստականի վրա դաժան հարձակումը համացանցում զայրույթի ալիք է առաջացրել

Թուրքական Գազիանթեփում թուրք տղամարդու կողմից սիրիացի տարեց կնոջ վրա դաժան հարձակումը զայրույթի ալիք է բարձրացրել համացանցում և կրկին քննարկումներ առաջացրել Թուրքիայում սիրիացի փախստականների նկատմամբ վերաբերմունքի հետ կապված, գրում է Middle East Eye-ը։

Նախօրեին համացանցում տարածված տեսանյութում երևում է նստարանին նստած 70-ամյա Լեյլա Մուհամմեդը, որին մոտենում են մի խումբ թուրք տղամարդիկ։ Նրանցից մեկը հանկարծ հարվածում է կնոջ դեմքին։ Հետո երևում է, որ կինը ցավից կռանում է, գոռում և ձեռքով ծածկում մի աչքը։

Հարձակման մեջ կասկածվողը ձերբակալվել է, իսկ ավելի ուշ պարզվել է, որ նա 39-ամյա Սաքըր Չաքիրն է:

Սոցիալական ցանցերում արշավ է սկսվել․ ակտիվիստները նմանակում են կնոջ կեցվածքը՝ տեղադրելով մի աչքը ձեռքով փակած իրենց լուսանկարները՝ օգտագործելով «կանգնի՛ր Լեյլայի կողքին» և «ո՛չ ռասիզմին» հեշթեգերը: Շատերը կոչ են անում Թուրքիայի կառավարությանը՝ պատասխանատվության ենթարկել հարձակման մեղավորներին:

«Պետք է կիրառվի զսպող օրենք, և խոցելիները պետք է իմանան իրենց իրավունքները, իսկ ընդունող երկիրը պետք է հարգի մարդու իրավունքները»,- գրել է Twitter-ի օգտատերերից մեկը։

Այս հարձակումը վերսկսել է նաև Թուրքիայում գտնվող սիրիացի փախստականների շուրջ խոսակցությունները: Սիրիական շահույթ չհետապնդող օպերատիվ օգնության խումբը, որի նպատակն է վերջ դնել սիրիացի խաղաղ բնակիչների նկատմամբ բռնությանը, Twitter-ում հրապարակել է հարձակման տեսանյութը՝ գրելով, դա «սա ռասիզմի և սիրիացի փախստականների նկատմամբ խտրականության աճող միտումի մի մասն է, և երկրները պետք է ավելին անեն՝ փախստականներին պաշտպանելու համար»:

Գազիանթեփի քաղաքապետ Դավութ Գյուլն այցելել է հիվանդանոց՝ կնոջը տեսակցության և լուսանկար հրապարակել՝ գրելով, որ կանգնած են ճնշվածի հետ՝ ընդդեմ կեղեքողի։

Հավելենք, որ Թուրքիայում շուրջ 3,7 մլն սիրիացի փախստական է ապրում։ Երկրում տնտեսական ճգնաժամի և սոցիալական լարվածության ֆոնին պարբերաբար դժգոհություններ կան փախստականներից, նաև տարբեր հարձակումների դեպքեր են գրանցվում։

Էմմա Չոբանյան