18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ադրբեջանի ՆԳՆ-ն դժգոհել է Բաքվում Մեծ Բրիտանիայի դեսպանատան հայտարարությունից և մեղադրել երկրի ներքին գործերին խառնվելու համար
Քաղաքականություն
17.05.2022 | 20:13
Ադրբեջանի ՆԳ նախարարությունը իր դժգոհությունն է հայտնել Բաքվում Մեծ Բրիտանիայի դեսպանատան հայտարարության կապակցությամբ, որում բրիտանական դիվանագիտական ներկայացուցչությունը շաբաթ օրը Բաքվի կենտրոնում հասարակական ակտիվիստների բողոքի ակցիայի ժամանակ ոստիկանության գործողությունները որակել է որպես բողոքի ազատության իրավունքի խախտում, հայտնում են տեղական լրատվամիջոցները։
«Ինչպես արդեն տեղեկացրել ենք՝ 2022 թվականի մայիսի 14-ին մի խումբ մարդիկ չարտոնված հանրահավաք են անցկացրել Սաբաիլ շրջանի Շատրվանների հրապարակում, որն անցկացվել է «Հավաքների ազատության մասին» օրենքի խախտմամբ։ Սակայն մասնակիցների անվտանգությունն ապահովվել է, ակցիայի ավարտին հայտարարություն է տրվել, ակցիայի ընթացքում միջադեպեր չեն արձանագրվել, ոչ ոք չի բերման ենթարկվել։ Սակայն նույն այդ օրը Ադրբեջանում Մեծ Բրիտանիայի դեսպանատունը կեղծ տեղեկատվություն է ներկայացրել բողոքի ակցիային ոստիկանության լուրջ միջամտության և մեծ թվով ձերբակալվածների առկայության մասին, ինչն անընդունելի է և հանդիսանում է միջամտություն Ադրբեջանի ներքին գործերին։ Անհասկանալի է, որ Մեծ Բրիտանիայի դեսպանատունը թերագնահատել է ակցիան և հանդես եկել մեղադրական հայտարարություններով, այն դեպքում, երբ կազմակերպիչներն ու մասնակիցներն անցկացրել են նորմալ հավաք և ոստիկանության վարքագիծը բավարար գնահատել։ Այս հայտարարությունը մենք դիտարկում ենք, որպես իրենց պարտականությունների կատարման ընթացքում ոստիկանության հեղինակությունը վնասելու փորձ։ Կոչ ենք անում դեսպանատանը՝ հերքել այս հայտարարությունն ու ընդունել իր սխալը»,- ասվում է ՆԳՆ հայտարարության մեջ։
Նշենք, որ Մեծ Բրիտանիայի դեսպանատունը կասկածի տակ էր դրել Ադրբեջանում խաղաղ ցույցի իրավունքի պահպանումը՝ մայիսի 14-ին Բաքվում խաղաղ ցուցարարների նկատմամբ բռնությունների և լրագրողների և հասարակական ակտիվիստների վրա գործադրվող ճնշումների հետ կապված։
«Խաղաղ ցույցերի իրավունքը և անկախ ԶԼՄ-ներն ազատ հասարակության հիմնասյուներն են։ Այդ իրավունքների պաշտպանությունը կասկածի տակ է դրվել վերջին միջադեպերի պատճառով, ինչպիսիք են մայիսի 14-ին խաղաղ ցույցի խափանումը և բլոգերների ու լրագրողների նկատմամբ բռնությունները, ինչպես Բախտիյար Հաջիևի ու Այթեն Մամեդովայի դեպքում։ Բռնությունների մասին բոլոր հայտարարությունները պետք է մանրամասն հետաքննվեն»,- ասվում է դեսպանատան հայտարարության մեջ։
Հավելենք, որ բողոքի ակցիան ուղեկցվել էր ոստիկանական բռնություններով։ Դեռ ակցիայից առաջ են ձերբակալություններ տեղի ունեցել, իսկ կազմակերպիչները սպառնալիքներ են ստացել նախագահականից։ Բուն ակցիայի ընթացքում ոստիկանությունը ցրել է ցույցը և թույլ չի տվել մասնակիցներին անցկացնել իրենց հավաքը։ Այս ամենն արձանագրվել է տասնյակ լրագրողների բազմաթիվ տեսանյութերում։
Էմմա Չոբանյան
