16.09.2026 | 18:46
ՀՀ-ն է որոշումներ կայացնելու TRIPP մուտք ու ելքի պահին. Փաշինյան. ՏԵՍԱՆՅՈՒԹ
Էրդողանի խորհուրդը ԵՄ-ին․ Ուկրաինայում պատերազմի ֆոնին ԵՄ-ն իր զարգացման նոր պատմությունը պետք է գրի
Քաղաքականություն
09.05.2022 | 21:40
Ուկրաինայում պատերազմի ֆոնին ժամանակն է, որ Եվրոպական միությունը իր զարգացման նոր պատմությունը գրի։ Վերջին տարիներին ԵՄ-ն հեռացել է իր կողմից հայտարարված նպատակներից՝ հայտնվելով առանձին պետությունների կարճաժամկետ շահերի ազդեցության տակ։ Այս մասին ասվում է Թուրքիայի նախագահ Ռեջեփ Թայիփ Էրդողանի՝ Եվրոպայի օրվան նվիրված հայտարարության մեջ, գրում է «Անադոլու» գործակալությունը։
Էրդողանը նշել է, որ Թուրքիայում Եվրոպայի օրը նշվում է 1999 թվականից, երբ Անկարային պաշտոնապես տրվել է անդամության թեկնածու երկրի կարգավիճակ։
«Ժամանակակից Եվրոպան առավել, քան երբևէ կարիք ունի համերաշխության և համագործակցության, և ամենակարևորը՝ խիզախ և հայեցակարգային դիրքորոշման։ Այսօր Թուրքիան ոչ միայն թեկնածու երկիր է և ՆԱՏՕ-ի անդամ, այլ նաև ուժեղ և նշանակալի գործընկեր, որը նշանակալի ներդրում ունի մայրցամաքում մարտահրավերները կանխելու գործում»,- ասել է Թուրքիայի նախագահը։
Նա նաև ուշադրություն է հրավիրել Ուկրաինայում պատերազմի բացասական հետևանքների վրա ամբողջ համաշխարհային հանրության համար։ Էրդողանը նաև խոսել է ԵՄ-ի համար Թուրքիայի ռազմավարական նշանակությունից․ «Եկել է ժամանակը կենտրոնանալու ընդհանուր նպատակների և ընդհանուր շահերի վրա՝ պահպանելով ընդհանուր արժեքները։ Կարևոր է զարգացնել հարաբերությունները Թուրքիայի և ԵՄ-ի միջև բոլոր ոլորտներում, ինչը բխում է երկու կողմերի շահերից»։
Էրդողանը նաև նշել է, որ չնայած բոլոր խոչընդոտներին՝ Անկարան պահպանում է կառուցողական դիրքորոշումը, շարունակում է համբերատար կերպով ու վճռականորեն շարժվել ԵՄ-ի լիիրավ անդամակցության նպատակին։
Էմմա Չոբանյան
