Բաքվում ԵՄ դեսպանը հայտարարել է, որ ցանկանում են ընդլայնել էներգետիկ և առևտրային համագործակցությունը Ադրբեջանի հետ

ԵՄ-ն շահագրգռված է Ադրբեջանի հետ էներգետիկ և առևտրային համագործակցության ընդլայնմամբ։ Ադրբեջանական լրատվամիջոցների փոխանցմամբ՝ այս մասին ասել է Բաքվում ԵՄ դեսպան Պետեր Միխալկոն։

«Հարավային գազային միջանցքը շատ կարևոր համատեղ նախագիծ է։ Էներգետիկ համագործակցությունը պետք է է՛լ ավելի ընդլայնվի, դրանում շահագրգռված է ԵՄ-ն»,- ասել է Միխալկոն։

Նա նշել է, որ ԵՄ-ն հետաքրքրված է նաև Ադրբեջանի հեռ առևտրային համագործակցության ընդլայնման հարցում։

«ԵՄ-ն Ադրբեջանի համար մնում է թիվ մեկ շուկան։ Ադրբեջանի արտահանման 51%-ն ուղղվում է եվրոպական շուկա։ 2021 թվականի ցուցանիշներով մենք հասել ենք նախահամաճարակային մակարդակին։ Մենք ցանկանում ենք ընդլայնել առևտրային համագործակցությունն Ադրբեջանի հետ, որ ավելի շատ ադրբեջանական ապրանքներ հասնեն եվրոպական շուկաներ, և հուսով ենք՝ նոր համաձայնագիրը կնպաստի դրան»,- ասել է ԵՄ դեսպանը։

Անդրադառնալով Հայաստանի և Ադրբեջանի հարաբերություններին՝ եվրոպացի դիվանագետը նշել է, որ Եվրոպական Խորհրդի նախագահ Շառլ Միշելը նպաստում է դրանց կարգավորմանը։

«ԵՄ Խորհրդի նախագահ Շառլ Միշելը նպաստում է Հայաստանի և Ադրբեջանի միջև խաղաղության կառուցմանը, և այս նախաձեռնության վերջնական նպատակը տարածաշրջանում կայունության և խաղաղության հաստատումն է»,- ասել է դեսպանը՝ նշելով, որ ԵՄ-ն ականազերծման հարցում ևս համագործակցում է Ադրբեջանի հետ։ Այս հարցում ֆինանսական փաթեթի չափը կազմում է 2 մլն եվրո։

Էմմա Չոբանյան