16.09.2026 | 21:15
Վթար Չարենցավան-Հրազդան ավտոճանապարհին. նախնական տվյալներով՝ կան չորս զոհ, մեկ տուժած
Մալիի խունտան խզել է ռազմական համագործակցությունը Ֆրանսիայի հետ
Քաղաքականություն
03.05.2022 | 16:45
Մալիի ռազմական խունտան հայտարարել է Ֆրանսիայի հետ ռազմական համագործակցության պայմանագրի խզման մասին։ Գործող իշխանությունները «վաղուց են տեսնում Ֆրանսիայի հետ ռազմական համագործակցության զգալի վատթարացում»: DW-ի ռուսական ծառայության փոխանցմամբ՝ այս մասին ազգային հեռուստատեսությամբ ասել է խունտայի խոսնակը։
Նա անդրադարձել է նաև ֆրանսիական ինքնաթիռների կողմից Մալիի օդային տարածքի խախտմանը, փետրվարին երկրից ֆրանսիական զորքերի դուրսբերման մասին հայտարարությանը, ինչպես նաև Մալիի բանակի հետ բոլոր համատեղ գործողությունները դադարեցնելու՝ Փարիզի որոշմանը, որն ընդունվել է անցյալ տարվա հունիսին։
Վերջին մի քանի շաբաթների ընթացքում Մալիի խունտան բազմիցս սպառնացել է դադարեցնել ռազմական համագործակցությունը Ֆրանսիայի հետ: Խոսքը համաձայնագրի մասին է, որը սահմանում է Մալիում ֆրանսիական «Բարխան» և եվրոպական «Տակուբա» ռազմական առաքելության իրավական շրջանակները, ինչպես նաև 2014 թվականին Ֆրանսիայի հետ պաշտպանության ոլորտում համագործակցության մասին համաձայնագիրը։
Ֆրանսիայի և Մալիի հարաբերությունները սկսեցին կտրուկ վատթարանալ այն բանից հետո, երբ երկրում իշխանությունը զավթեց ռազմական խունտան։ Լարվածությունը սրվել է ռուսական «Վագներ» մասնավոր ռազմական ընկերության (ЧВК) հետ Մալիի զինվորականների համագործակցության պատճառով։ Մալիի ռազմական խունտան հերքում է երկրում «Վագների» վարձկանների ներկայության մասին տեղեկությունները։
Տաթև Ֆռանգյան
