27.03.2026 | 17:24
Դատավոր Գառնիկ Ստեփանյանն արդարացվել է
Թուրքիայում ոստիկանությունը մայիսմեկյան ցույցերի ժամանակ ծեծել և ձերբակալել է տասնյակ ցուցարարների
Քաղաքականություն
02.05.2022 | 21:35
Թուրքիայի ոստիկանությունը ձերբակալել է տասնյակ ցուցարարների, որոնք փորձել են հասնել Ստամբուլի գլխավոր Թաքսիմ հրապարակ մայիսի 1-ի ցույցերի ժամանակ՝ ընդդեմ մոլեգնող գնաճի պատճառով առաջացած տնտեսական դժվարությունների, գրում է Reuters-ը։
Ստամբուլի նահանգապետարանը թույլ է տվել տոնական միջոցառումներ անցկացնել մեկ այլ թաղամասում, իսկ այլ վայրերում հավաքներն անօրինական է համարել։ Reuters-ի լրագրողը տեսել է, թե ինչպես է ոստիկանությունը ծեծում ցուցարարներին ու նրանց ձեռնաշղթաներ հագցնում։ Ոստիկանությունը Բեշիկթաշ թաղամասում 30 մարդու է ձերբակալել, իսկ Շիշլիում՝ 22։
Ստամբուլի նահանգապետարանի տարածած հայտարարության մեջ ասվում է, որ 164 ցուցարար է բերման ենթարկվել ամբողջ քաղաքում՝ «անօրինական ցույցեր կազմակերպելու փորձի համար»։
Մայիսի 1-ին աշխարհի տարբեր երկրներում ցույցեր են անցկացվում աշխատավորների ու արհմիությունների գլխավորությամբ։
Սպասվում է, որ ապրիլին Թուրքիայում տարեկան գնաճի մակարդակը կհասնի 68%-ի, ինչը պայմանավորված է ռուս-ուկրաինական հակամարտությամբ և ապրանքների գների աճով, որը միայն փոքր-ինչ կնվազի մինչև տարեվերջ։
Հենց գնաճն ու տնտեսական դժվարություններն են նշվել մի շարք ակցիաների կազմակերպիչների մայիսմեկյան հայտարարություններում։
«Մեր հիմնական թեման այս տարի պետք է լիներ կյանքի ծախսերը։ Յուրաքանչյուր ամսվա սկզբին հայտարարվում է գնաճ, ամեն ամիս աշխատավարձին պետք է ավելացնել գնաճի ցուցանիշը»,- ասել է Թուրքիայի աշխատավորական միությունների կոնֆեդերացիայի ղեկավար Էրգյուն Աթալայը։
Էմմա Չոբանյան
