15.09.2026 | 22:12
«Մարդը պետք է գերակա լինի ԱԲ-ի նկատմամբ»․ Microsoft-ը վարքագծի կանոնագրքի նախագիծ է հրապարակել
ԱՄՆ Կոնգրեսում նշվել է Հայոց ցեղասպանության 107-րդ տարելիցը
Քաղաքականություն
01.05.2022 | 17:14
Միացյալ Նահանգների Կոնգրեսում ապրիլի 27-ին ամերիկահայ կառույցների, ԱՄՆ-ում Հայաստանի դեսպանության և ԱՄՆ Կոնգրեսի հայկական հանձնախմբի ջանքերով կազմակերպվել էր Հայոց ցեղասպանության զոհերի հիշատակին նվիրված միջոցառում: Այս մասին տեղեկացնում է «Ամերիկայի ձայն»-ը։
Ոգեկոչման միջոցառմանը մասնակցում էին ամերիկացի կոնգրեսականներ, տարբեր կազմակերպությունների ներկայացուցիչներ, ամերիկահայ համայնքի շրջանակներ, հոգևորականներ ու իրավապաշտպաններ: Միջոցառման հատուկ հյուրերից էին Պուլիցերյան մրցանակի դափնեկիր, ամերիկահայ գրող Փիթեր Բալաքյանը, ԱՄՆ Կրոնական ազատության միջազգային հանձնաժողովի նախագահ Նադին Մաենզան: Միջոցառումը վարում էր ԱՄՆ Կոնգրեսի գրադարանի աշխատակից Խաչիկ Մուրադյանը:
Ելույթով հանդես եկող մի շարք կոնգրեսականներ իրենց հարգանքի տուրքն են մատուցում Հայոց ցեղասպանության զոհերի հիշատակին և կարևորում ԱՄՆ-ի ու աշխարհի երկրների կողմից Հայոց ցեղասպանության ճանաչումը:
«Մենք հավաքվել ենք այստեղ՝ հիշելու պատմությունը, Հայոց ցեղասպանությունը, դա իսկապես լավ հնարավորություն է՝ կրկին բարձրաձայնելու՝ «այլևս երբեք», – նշել է ԱՄՆ սենատոր Վան Հոլենը՝ ընդգծելով Հայոց ցեղասպանության ճանաչման կարևորությունը ցեղասպանության հանցագործությունների կանխարգելման գործում:
Կոնգրեսական Ջոն Սարբանեսն էլ իր հերթին շեշտել է. «Այժմ բոլորիս պարտականությունն է վստահ լինել, որ Հայոց ցեղասպանության վերաբերյալ կրթական ծրագրերը լինեն խորաթափանց, բազմաշերտ և ազդեցիկ, որքան հնարավոր է»:
Միջոցառման բանախոսների թվում էր նաև ԱՄՆ Կոնգրեսի հայկական հարցերով հանձնախմբի համանախագահ, կոնգրեսական Ֆրենկ Փալոնը, ով իր խոսքում ընդգծել է Հայաստանի ու Լեռնային Ղարաբաղի զարգացման ու անվտանգության կարևորությունը, քանի որ վերջիններս, ըստ կոնգրեսականի, կիսում են ԱՄՆ-ի ժողովրդավարական արժեքները: Նա շեշտել է, որ չնայած Հայոց ցեղասպանությունը ստացել է ճանաչում ԱՄՆ-ի իշխանությունների կողմից, սակայն պայքարն այս ուղղությամբ շարունակվում է:
Իր հերթին կոնգրեսական Աննա Էշուն իր ելույթում կարևորել է ԱՄՆ Կոնգրեսի հայկական հարցերով հանձնախմբի գործունեությունը՝ նշելով, որ այս տարի լրանում է հանձնախմբի կազմավորման 30-ամյակը: Այն հիմնվել է նաև Ցեղասպանության հիմնախնդիրը բարձրաձայնելու համար, ասել է կոնգրեսականը:
Ելույթ ունեցողների շարքում էր նաև հայկական հանձնախմբի համանախագահ Ջեքի Սփիերը, ով նաև ունի հայկական արմատներ: Իր խոսքում կոնգրեսական Սփիերը կարևորեց ԱՄՆ Կոնգրեսի երկու պալատների կողմից Հայոց ցեղասպանության մասին բանաձևերի ընդունման փաստը:
՛՛Եղել են ժամանակներ, երբ կասկածում էինք, որ դա հնարավոր է, նշել է կոնգրեսականը՝ ընդգծելով, որ չափազանց կարևոր է գիտակցել, որ անհրաժեշտ է շարունակել առաջ շարժվել՛՛:
Բացի վերոհիշյալ կոնգրեսականներից, ելույթներով հանդես եկան կոնգրեսականներ Ջիմ Կոստան, Քերոլին Մալոնին, Բրեդ Շերմանը և այլ օրենսդիրներ, ԱՄՆ-ում ՀՀ դեսպան Լիլիթ Մակունցը, հայկական և ամերիկահայ կազմակերպությունների ղեկավարներ ու ներկայացուցիչներ, ինչպես նաև ամերիկահայ գրող Փիթեր Բալաքյանը:
