18.12.2025 | 18:26
ԱՄՆ-ն առաջարկել է Զապորոժիեի ԱԷԿ-ն օգտագործել երեք երկրների համար. Կիևը դա անարդար է համարում. Զելենսկի
Թուրքիայում Հայոց ցեղասպանությունը ժխտող միջազգային կոնֆերանս է անցկացվել
Քաղաքականություն
21.04.2022 | 15:16
Թուրքիայում այս տարի ևս ապրիլի 24-ի նախաշեմին Հայոց ցեղասպանությունը ժխտող միջազգային կոնֆերանս է անցկացվել՝ երկրի նախագահի գրասենյակի համակարգմամբ։ Թուրքական լրատվամիջոցների հաղորդմամբ՝ Թուրքիայի նախագահի աշխատակազմի հաղորդակցությունների գծով տնօրեն Ֆահրեթթին Ալթունը «ելույթ է ունեցել 1915 թվականի իրադարձություններին նվիրված կոնֆերանսում՝ միջազգային իրավունքի և պատմության տեսանկյունից»։
Ալթունը, բնականաբար, Հայոց ցեղասպանությունը ժխտող թուրքական թեզերով է հանդես եկել։ Նա նշել է, որ Թուրքիան չի անհանգստանում իր պատմությամբ և չի վախենում իր ապագան կիսել հարևանների հետ։
«Հակառակ երրորդ կողմերի, որոնք շեղեցին 1915 թվականի իրադարձությունները հանուն իրենց քաղաքական օրակարգի, մենք հավատարիմ ենք մնում մեր հարևանների հետ խնդիրների լուծմանը և տարածաշրջանում խաղաղության ու կայունության ապահովմանը, ինչպես դա արել ենք անցյալում»,- ասել է Ալթունը։
Ալթունը նշել է, որ Հայոց ցեղասպանությունը, որը նա անվանել է 1915 թվականի իրադարձություններ, «խեղաթյուրվում ու ձևափոխվում է քաղաքական նպատակներով»։
«Այդ իրադարձությունները «շահարկվել և խեղաթյուրվել են կեղտոտ քաղաքական հավակնությունների համար՝ անհիմն մեղադրանքներով»»,- ասել է նա՝ հավելելով, որ, իբր, «թուրքերի ու հայերի ընդհանուր պատությունը և դարավոր խաղաղ գոյակցությունը պատմության մեջ եզակի բան է»։
Ինչպես միշտ՝ թուրք պաշտոնյան նշել է, որ ցեղասպանություն «երբեք տեղի չի ունեցել»։
«Արևմտյան շատ երկրներ փորձում են 1915 թվականի իրադարձությունները շահարկել իրենց ազգային և արտաքին շահերի համար, ինչն ինքնին մեր երկրի նկատմամբ ահաբեկչական և հովանավորչական մոտեցման դրսևորում է»,- ասել է թուրք պաշտոնյան։
Հավելենք, որ նման ևս մեկ գիտաժողով էլ Թուրքիայում անցկացվել էր նախորդ տարի։
Էմմա Չոբանյան
