20.11.2024 | 11:38
Կադաստրի կոմիտեն հորդորում է ինքնակամ կառույցները ժամանակին հաշվառել
Փաշինյանը ճիշտ է ասել, որ Արցախի կարգավիճակն այլևս նպատակ չէ. Վիգեն Խաչատրյան․ ՏԵՍԱՆՅՈՒԹ
Քաղաքականություն
14.04.2022 | 15:21
«Նիկոլ Փաշինյանն ասաց, որ մեր բոլոր գործընկերներն ասում են՝ եթե ուզում եք, որ ձեզ օգնենք, և մենակ չմնաք Թուրքիայի և Ադրբեջանի դիմաց, նշաձողն իջեցրեք: Այսինքն՝ ոչ թե Փաշինյանն է առաջարկում նշաձողն իջեցնել, այլ ասում է՝ մեզ դա են ասում: Հետևաբար մենք պետք է իրենց հետ քննարկենք»,- ԱԺ-ում լրագրողների հետ զրույցում այս մասին նշեց «Քաղաքացիական պայմանագիր» խմբակցության պատգամավոր Վիգեն Խաչատրյանը:
Նրա դիտարկմամբ՝ Փաշինյանը ճիշտ է ասել, որ Արցախի կարգավիճակն այլևս նպատակ չէ:
«Վարչապետն ասում է՝ մենք փոխում ենք հարցադրումը, իրենց հետ խոսում ենք անվտանգության երաշխիքների և իրավունքների մասին»,-ասաց Խաչատրյանը:
«Որպեսզի մենք շարունակենք մեր փորձերը՝ ունենալ աջակցություն, մենք պետք է իրենց հետ խոսենք, դեռ պարզ չէ՝ իրենց առաջարկներն ինչ են, և դեռ Ադրբեջանն էլ պիտի իրենց առաջարկներին համաձայն լինի, որ լուծում լինի»,- ասաց պատգամավորը:
«Արցախի իշխանության կարծիքը ոչ միայն պետք է հաշվի առնել, նրանց հետ մանրամասն պետք է քննարկել բոլոր հնարավոր զարգացումները: Մի պահ, Աստված մի արասցե, պատկերացրեք՝ ՌԴ-ն հետ քաշեց խաղաղապահներին, ո՞ր ուժերն են պահելու Արցախը»,- նշեց Խաչատրյանը՝ հիշեցնելով, որ Պուտինն ասել է՝ Արցախը Ադրբեջան է, ու որևէ մեկը չի ընդվզել դրա դեմ:
Նա նշեց, որ ՀՀ իշխանությունները հետևողականորեն աշխատում են ՌԴ-ի հետ ու դրա ապացույցը Փաշինյանի առաջիկա հանդիպումն է Պուտինի հետ. «Միշտ եղել է փոխհամաձայնեցված բարյացակամ վերաբերմունք, ՌԴ-ն միշտ եղել է մեր ռազմավարական դաշնակիցը, բայց դա չի նշանակում, որ ՌԴ-ից պահանջենք՝ արհամարհի իր պետական շահերը ու սպասարկի Հայաստանի շահը: Եթե ձեզ թվում է, թե մենք պիտի Ռուսաստանին խելք սովորեցնենք, ես ձեզ շնորհավորում եմ»:
Հարցին՝ արևմտյան երկրնե՞րն են առաջարկել Հայաստանին նշաձողն իջեցնել, թե՞ ՌԴ-ն, Թուրքիան՝ Վիգեն Խաչատրյանը պատասխանեց, որ երկրների անուններ չի կարող տալ, որովհետև չգիտի, բայց Փաշինյանն ասում էր՝ բոլոր գործընկեր երկրները:
«Դուք Մինսկի խմբից երբևիցե լսե՞լ եք Ղարաբաղի անկախություն բառը, խոսքը գնում է կարգավիճակի մասին: Ադրբեջանի կազմում չի նշանակում անկարգավիճակ, դա էլ է կարգավիճակ: Ես չեմ ասում՝ դա ճիշտ է, բայց ինքնորոշումը կարող է լինել երեք տիպի՝ տվյալ պետության կազմում ժողովուրդն ինքնորոշվում է, երկրորդը՝ միանում է այլ պետության, երրորդը՝ դառնում է անկախ պետություն: Մինսկի խումբը և մնացած մեր գործընկերները ասում են Ղարաբաղի կարգավիճակ, չեն ասում Ղարաբաղի անկախություն: Ես ընդունում եմ, որ դուք ինձանից շատ եք ուզում, որ Ղարաբաղը անկախ լինի, ես էլ եմ ուզում, դա մե՞ր ուզելով է»,- նշեց պատգամավորը:
Մանրամասները՝ տեսանյութում:
