Թմրանյութի հետ կապ չունեմ, եթե որոշեմ թեստ հանձնել, կանեմ առանց որևէ մեկի հրահանգի․ Կարեն Սարուխանյան

«Ես թմրանյութի հետ բացարձակ կապ չեմ ունեցել և չունեմ»,- Factor.am-ի հարցադրմանն այսպես արձագանքեց ԱԺ «Քաղաքացիական պայմանագիր» խմբակցության պատգամավոր Կարեն Սարուխանյանը։

Մենք պատգամավորին զանգահարել էինք մամուլում շրջանառվող տեղեկության առիթով, ըստ որի՝ Սարուխանյանի արյան մեջ թմրանյութի առկայության թեստը դրական է եղել։ Պատգամավորը նշեց, որ որևէ թեստ հանձնելու կարիք չի տեսնում։

Հարցին՝ իրեն ՔՊ վարչությունից թմրանյութի թեստ հանձնելու հրահանգ տվե՞լ են, Կարեն Սարուխանյանը պատասխանեց․ «Այս երկրում ինձ որևէ մեկը նման հրահանգ չի կարող տալ»։

Հստակեցնող հարցին՝ իր քաղաքական թիմի առաջնորդ Նիկոլ Փաշինյա՞նն էլ չի կարող, Սարուխունյանն ասաց․ «Եթե որոշեմ, դա կանեմ։ Եթե գտնեմ հարմար պահ և դրա կարիքը, ես դա կանեմ։ Եթե անեմ, առանց հրահանգի կանեմ։ Ինձ որևէ մեկը հրահանգ տալ չի կարող։ Կգա ժամանակը կտեսնենք, թմրանյութի թեստ կհանձնեմ, թե՝ ոչ»։

Հիշեցնենք, որ ԱԺ նախագահ Ալեն Սիմոնյանը տեղեկացրել էր, որ Գյումրիի քաղաքապետի առաջիկա ընտրություններում ՔՊ-ի թեկնածուն Կարեն Սարուխանյանն է։ Ըստ մամուլում շրջանառվող տեղեկությունների՝ նախորդ երեքշաբթի օրը կայացած ՔՊ վարչության նիստում, Նիկոլ Փաշինյանը նիստին ներկա ՔՊ խմբակցության պատգամավոր, Գյումրիի քաղաքապետի հավանական թեկնածու Կարեն Սարուխանյանին թմրանյութի թեստ հանձնելու է ուղարկել։ Այս թեմայի վերաբերյալ մեր հարցին ի պատասխան իշխանական պատգամավորը հայտարարեց, որ ինքն իրավասու չէ վարչության փակ նիստից որևէ բան հանրայնացնել։

Օրերս Կարեն Սարուխանյանի քեռորդին՝ Վարուժան Խոջումյանը, ֆեյսբուքի էջում հայտնել էր, որ դուրս է գալիս «Քաղաքացիական պայմանագիր» կուսակցությունից։

Ավելի վաղ ԶԼՄ-ները հայտնել էին, որ Վարուժան Խոջումյանը Գյումրիի ավագանու ՔՊ խմբակցության անդամ Պարգև Գևորգյանի հետ ձերբակալվել է թմրանյութ պահելու ու օգտագործելու կասկածանքով, այնուհետև ազատ է արձակվել։ Վարուժ Խոջումյանը «Գյումրի» ԲԿ-ի մանկական բաժանմունքի տնտեսական աշխատակից է, նաև՝ Գյումրիի ՔՊ տարածքային կազմակերպության խորհրդի անդամ։

Մանյա Պողոսյան